नरडाणा प्रतिनिधी :- एका अल्पवयीन मुलीला फूस लावून पळवून नेणाऱ्या संशयित इसमाचा छडा लावून, कर्नाटक राज्यातील अत्यंत दुर्गम भागातून मुलीची यशस्वी सुटका केल्याबद्दल मुडावद येथील पोलीस पाटील तुमडू भटू वाडीले यांचा प्रजासत्ताक दिनानिमित्त गौरव करण्यात आला. जिल्ह्याचे पालकमंत्री जयकुमार रावल यांच्या हस्ते त्यांना सन्मानित करण्यात आले.
नेमकी घटना काय?
नरडाणा पोलीस स्टेशनमध्ये एका अल्पवयीन मुलीला संशयित इसमाने फूस लावून पळवून नेल्याचा गुन्हा दाखल होता. अनेक दिवसांपासून या दोघांचा कोणताही थांगपत्ता लागत नव्हता. हे प्रकरण अत्यंत संवेदनशील असल्याने धुळे जिल्ह्याचे पोलीस अधीक्षक श्रीकांत धिवरे यांनी स्वतः यामध्ये लक्ष घालून नरडाणा पोलीस स्टेशनचे सहाय्यक पोलीस निरीक्षक नीलेश मोरे यांना तपासाबाबत वेळोवेळी मार्गदर्शन केले.
दुर्गम भागात थरारक मोहीम
संशयित इसम कर्नाटक राज्यातील एका अतिशय दुर्गम भागात असल्याची खात्रीशीर माहिती मिळाल्यानंतर, सपोनि नीलेश मोरे यांनी तातडीने एक विशेष पथक तयार केले.
या पथकात:
पोलीस उपनिरीक्षक: विजय आहेर
पोलीस कॉन्स्टेबल: दिपक भामरे
महिला पोलीस कॉन्स्टेबल: अनिता पवार
पोलीस पाटील: तुमडू भटू वाडीले
यांचा समावेश होता. या पथकाने कर्नाटकात पोहोचून स्थानिक पोलिसांच्या मदतीने अत्यंत शिताफीने शोधमोहीम राबवली आणि संशयित आरोपीला ताब्यात घेऊन अल्पवयीन मुलीची सुटका केली.
पोलीस पाटलांच्या कामगिरीची दखल
या संपूर्ण मोहिमेत पोलीस पाटील तुमडू भटू वाडीले यांनी बजावलेली भूमिका अत्यंत महत्त्वाची ठरली. त्यांच्या या उत्कृष्ट कामगिरीची दखल घेत २६ जानेवारी रोजी आयोजित शासकीय ध्वजारोहण समारंभात पालकमंत्री जयकुमार रावल यांच्या हस्ते त्यांना प्रशस्तीपत्र देऊन गौरविण्यात आले.
या यशाबद्दल पोलीस दलाचे आणि विशेषतः तपास पथकाचे सर्वत्र कौतुक होत आहे.
कोणत्याही टिप्पण्या नाहीत:
टिप्पणी पोस्ट करा