दिल्ली करोना विषाणूच्या प्रादुर्भावामुळे संपूर्ण जगात अनागोंदी माजली आहे. करोनावर औषध शोधण्यासाठी जगभरातील अनेक शास्त्रज्ञ, डॉक्टर्स अहोरात्र परिश्रम करीत आहेत. करोनावर निश्चित औषध अद्याप सापडलेले नाही.
मात्र, करोनाला रोखण्यासाठी अनेक अशास्त्रीय उपाययोजनांची चर्चा, प्रसार सुरू आहे. त्यातच 'अल्कोहोलच्या सेवनामुळे करोना होत नाही', अशा आशयाच्या अनेक पोस्ट सोशल मीडियावर फिरल्या. काहींनी त्याचा गांभीर्याने विचार केला, तर काही मद्यशौकिनांत उत्साह संचारला. प्रत्यक्षात मात्र, अल्कोहोलच्या सेवनामुळे करोनाचा धोका वाढत असल्याचे जागतिक आरोग्य संघटनेने (डब्ल्यूएचओ) स्पष्ट केले आहे.
'सातत्याने किंवा अधिक प्रमाणात अल्कोहोलचे सेवन केल्यास करोनासह इतर आजारांचाही धोका वाढतो',असे स्पष्टीकरण जागतिक आरोग्य संघटनेने सोमवारी दिले. 'डब्ल्यूएचओ'ने सोमवारी करोनाला प्रतिबंध करण्यासंबंधीच्या उपायांबाबत ट्विटरद्वारे सूचना जारी केल्या. त्यात अल्कोहोलच्या सेवनामुळे करोनाचा धोका वाढतो, असे स्पष्ट करण्यात आले आहे.
करोनाचा प्रादुर्भाव रोखण्यासाठी अल्कोहोलयुक्त सॅनिटायझरने वारंवार हात धुणे गरजेचे असल्याचे वैद्यकीय तज्ज्ञांकडून सांगण्यात येत आहे.
सॅनिटायझरमध्ये अल्कोहोलचे प्रमाण सुमारे ४० ते ५० टक्के असते. दारूमध्येही अल्कोहोलचे प्रमाण मोठे असते. त्यामुळे हात धुण्यासाठी उपयुक्त असलेले सॅनिटायर आणि अल्कोहोलचा समावेश असलेली दारू यांचा संबंध जोडला जाऊ लागला आहे. सॅनिटायझरप्रमाणे दारूसुद्धा करोनाला प्रतिबंध करते, असे सांगितले जात आहे.
काही दिवसांपूर्वी नकली अल्कोहोलचे सेवन केल्यामुळे इराणमध्ये सुमारे तीनशे नागरिकांचे बळी गेले होते. तर, लॉकडाउनमुळे बंद असलेली दारूची दुकाने सुरू करण्यात यावी, अशी मागणी भारतातील मद्यपींकडून होते आहे. आता जागतिक आरोग्य सघटनेने सोमवारी दिलेल्या स्पष्टीकरणानंतर अल्कोहोल आणि करोनाविषयीचा हा संभ्रम दूर होईल, असा विश्वास वैद्यकीय तज्ज्ञांना वाटत आहे.
डब्ल्यूएचओ म्हणते...
एकमेकांपासून किमान एक मीटरचे अंतर ठेवा
ज्या पृष्ठभागांशी आपला सातत्याने संपर्क येतो त्यांना निर्जंतूक करा
वारंवार हात धुवा आणि ते कोरडे करा
नाक, तोंड, डोळे या अवयवांना हात लावणे टाळा
करोना विषाणू हवेतून पसरत नाही
इतरांशी कमीत कमी संपर्क ठेवणे हा करोनाला प्रतिबंध घालण्याचा सर्वोत्तम उपाय आहे
कोणत्याही टिप्पण्या नाहीत:
टिप्पणी पोस्ट करा