पालकमंत्री सत्तार यांच्याकडून उपाययोजनांचा आढावा.
धुळे प्रतिनिधी करोना विषाणूच्या प्रतिबंधासाठी जिल्ह्यात प्रशासनाच्या माध्यमातून राबविण्यात येत असलेल्या उपाययोजना अभिनंदनीय आहेत. करोनाच्या प्रतिबंधासाठी हिरे शासकीय वैद्यकीय महाविद्यालय व सर्वोपचार रुग्णालयात १२० खाटांचा विलिनीकरण कक्ष तत्काळ कार्यान्वित करण्यात यावा, असे निर्देश जिल्ह्याचे पालकमंत्री तथा राज्याचे महसूल, ग्रामविकास, बंदरे, खार जमिनी विकास, विशेष सहाय्य विभागाचे राज्यमंत्री अब्दुल सत्तार यांनी दिले आहेत.
पालकमंत्री सत्तार यांनी बुधवारी जिल्हाधिकारी गंगाथरण डी., पोलिस अधीक्षक चिन्मय पंडित यांच्याशी दूरध्वनीवरून संवाद साधला. त्यावेळी ते बोलत होते.
या वेळी पालकमंत्री सत्तार यांनी 'करोना' विषाणू प्रतिबंधासाठी सुरू असलेल्या उपाययोजनांचा सविस्तर आढावा घेतला. पालकमंत्री सत्तार यांनी सांगितले, या आजारावरील औषधांचा साठा पुरेसा उपलब्ध करून ठेवावा. औषधे व मास्कचा वाढीव दराने विक्री किंवा तुटवडा होणार नाही यासाठी संबंधित अन्न व औषध प्रशासनास आपल्यास्तरावरून निर्देश द्यावेत. 'होम क्वारंटाइन' केलेल्या नागरिकांच्या आरोग्याची वेळोवेळी चौकशी करावी. तसेच ते नागरी समूहात एकत्र येणार नाहीत याची दक्षता घ्यावी, असेही पालकमंत्री सत्तार यांनी सांगितले.
हिरे शासकीय वैद्यकीय महाविद्यालय व सर्वोपचार रुग्णालयात 'करोना' विषाणू तपासणी यंत्रणा कार्यान्वित करण्यात आल्याने तत्काळ अहवाल प्राप्त होतील. त्यामुळे संशयित रुग्णांवर औषधोपचार वेळेत होतील, असेही त्यांनी सांगतले. जिल्हाधिकारी गंगाथरण डी. यांनी सांगितले, धुळे जिल्ह्यात आतापर्यंत पंधरा हजार नागरिकांना 'होम क्वॉरंटाइन' करण्यात आले आहे. त्यांच्यावर आरोग्य विभागाचे कर्मचारी लक्ष ठेवून असून, आतापर्यंत ७५ रुग्णांच्या नमुन्यांची चाचणी करण्यात आली असून, त्यांचे अहवाल 'निगेटिव्ह' आलेले आहेत. तसेच हिरे शासकीय वैद्यकीय महाविदयालय व सर्वोपचार रुग्णालयात बुधवार (दि. १) पासून करोनाच्या नमुन्यांची चाचणी करण्यास सुरुवात झाली आहे. याशिवाय हायड्रोक्लोरोक्वीनसह आवश्यक औषधे, मास्कचा पुरेसा साठा उपलब्ध असल्याची माहिती जिल्हाधिकाऱ्यांनी दिली. दरम्यान, करोनाच्या प्रतिबंधासाठी धुळे जिल्ह्यात संचारबंदीच्या कालावधीत या संचारबंदीचे उल्लंघन केल्याबद्दल १३६ गुन्हे दाखल झाले असून तीन जणांना अटक करण्यात आली आहे. तसेच १५३ वाहने जप्त करण्यात आली आहेत, अशीही माहिती या वेळी पालकमंत्री सत्तार यांना देण्यात आली.
कोणत्याही टिप्पण्या नाहीत:
टिप्पणी पोस्ट करा