तांडा कुंडाणे (प्रतिनिधी)धुळे तालुक्यातील लक्षवेधी निवडणूक ठरलेल्या वेल्हाणे ग्रामपंचायत निवडणुकीत तीन मातब्बर माजी सरपंचांना धूळ चारत श्री चांगदेव परिवर्तन पॅनल ने 11 पैकी 7 जागा राखत दमदार विजय मिळवला आहे.
श्री चांगदेव परिवर्तन पॅनलचे नेतृत्व राजू दादा पहिलवान, लोटन दादा वाघ, धर्यसिंग पवार, चुडामन मराठे यांनी केले.गावातून सर्वात जास्त मताधिक्क्याने निवडून येण्याचा बहुमान प्रभाग क्रमांक तीन मधील सदस्य शितलताई राजू पाटील यांनी पटकावला आहे.त्या 154 मतांच्या मताधिक्क्याने निवडून आल्या. तर विशेष म्हणजे विद्यमान सरपंच विद्या ताई बोरसे यांना मालुताई अमोल पवार यांनी धूळ चारत 132 च्या मताधिक्क्याने विजय प्राप्त केला आहे.
या विजयाची चर्चा पंचक्रोशीत होत आहे. ग्राम विकास पॅनल ने 11 पैकी 4 जागांवर विजय मिळवला आहे. अशा या चुरशीच्या ठरलेल्या निवडणुकीकडे संपूर्ण पंचक्रोशीतील लक्ष लागून होते. आता सरपंच सोडती निघण्याची वाट ग्रामस्थ पाहत आहेत.सर्व विजयी उमेदवारांचे गावकऱ्यांनी आनंदात स्वागत केले आहे आणि पराभूत उमेदवारांनी ही मोठ्या मनाने आपला पराभव स्वीकारला आहे.
अतिसंवेदनशील म्हणून ओळखल्या जाणाऱ्या वेल्हाणे गावात शांततेच्या वातावरणात संपूर्ण निवडणूक निकाल पार पडला याचा आनंद गावकरी व्यक्त करत आहेत.
कोणत्याही टिप्पण्या नाहीत:
टिप्पणी पोस्ट करा