शिरपूर सहकारी साखर कारखाना सुरू करण्याबाबत बैठक संपन्न,सर्वतोपरी शेतकऱ्यांचा जिव्हाळ्याचा जीवनदायी प्रकल्प सुरू करण्यासाठी जनजागृती करण्याचा निर्णय..!

   

शिरपुर(प्रतिनिधि):-शिरपुर सह. साखर कारखाना सुरू करण्यासाठी जनजागृती करण्यासाठी आयोजित बैठकीत महत्त्वपूर्ण ठराव एकमताने मंजूर करण्यात आला.या बैठकीत शेतकरी (शेतकरी) विकास फाऊंडेशन,किसान जागृती मंच, तसेच विविध पक्षांचे कार्यकर्ते, शेतकरी-सभासद आदींनी मोठ्या प्रमाणात उपस्थिती नोंदवली. रविवारी दि.28 नोव्हेंबर ला दुपारी ४ ते ७ वाजेपर्यंत सुरू असलेल्या या सभेत विविध वक्त्यांनी शिरपूर सह.साखर कारखाना भाड्याने सुरू करण्याबाबत आपले मत व्यक्त केले. 

शेतकरी सहकारी साखर कारखाना (शिसाका) बाबतीत  एक महत्त्वाची बाब अशी आहे की, हा सहकारी साखर कारखाना 2011 पासून म्हणजे 10 वर्षांहून अधिक काळ बंद आहे.यामुळे शिरपूर तालुक्याच्या सर्वांगीण विकासाला ब्रेक लागला असून तालुक्यातील शेतकरी बंधू भगिनींसह सर्वच घटकांचे प्रचंड आर्थिक नुकसान झाले आहे. शिसाका बंद मुळे कामगार, शेतकरी, व्यापारी वर्ग प्रचंड नुकसान झाल्याने नाराज झाला आहे. सदर साखर कारखाना म्हणजे महत्त्वपूर्ण सहकारी प्रकल्प बंद पडणे हे देखील एक प्रमुख कारण आहे.

कारण हा सहकारी साखर कारखाना सुरू राहिला असता तर,दर महिन्याला कोट्यवधी रुपयांची उलाढाल शिरपूर तालुक्यात होत होती. त्यामुळे येथील आर्थिक विकास होण्यास मदत मिळत होती. परिसरातील शेतकरी,मजुरांसह सामान्य माणसाचा देखील आर्थिक विकास मंदावला आहे. 

शेजारील शहादा,चोपडा,नंदुरबार,नवापूर येथील सहकारी साखर कारखाने भाडेतत्त्वावर देऊन सुरळीत चालवले जात आहेत.त्या चारही कारखान्यांचे बॉयलर पेटले असून,आपल्याकडे शिसाकाच्या विद्यमान निवडून आलेल्या संचालक मंडळाने गेली पाच वर्षे वाया घालवली आहेत. याला त्यांची अनिर्णयतेची स्थिती कारणीभूत आहे. आता सर्वसामान्य जनतेने एकत्र येऊन शेतकऱ्यांच्या जीवनदायी प्रकल्पाला संजीवनी देण्यासाठी ठोस निर्णय घ्यावा.कारण सध्याच्या संचालक मंडळाची मुदत संपूनही त्यांना कोणतीही मुदतवाढ मिळालेली नसताना, अद्यापही पदावरुन पायउतार झाले नाहीत. 

त्यामुळे सदर साखर कारखाना भाडेतत्वावर चालविला जाण्याचा मार्गही बंद होत आहे.यावरून हे स्पष्ट होते की, शिरपूर सहकारी साखर कारखाना सुरू करून तो सुरळीत चालवण्यात सध्याच्या संचालक मंडळाला स्वारस्य नाही.येत्या काळात या विषयावर लवकरच जनजागृती करण्यासाठी प्रांताधिकारी कार्यालयासमोर उपोषण करणार आहे. लवकरच शिसाका बचाव समिती तर्फे उपोषणास बसण्याचा निर्णयही या सभेत उपस्थित सर्वांनी एकमताने मंजूर केला.बैठकीस शिवसेना, राष्ट्रवादी काँग्रेस,काँग्रेस,प्रहार जनशक्ती संघटना,शेतकरी विकास फाऊंडेशन, किसान संघर्ष समिती,महाविकास आघाडी, धुळे जिल्हा जनजागरण मंच इ.च्या प्रतिनिधींनी एकमताने पाठिंबा दिला.तालुक्यातील इतर सहकारी संस्थांच्या दुरावस्थेवरही या सभेत चर्चा करण्यात आली. सर्वच वक्त्यांनी आपल्या भाषणात तहसीलच्या सहकारी संस्थांतील शेतकऱ्यांच्या समस्यांकडे जनप्रतिनिधींनी दुर्लक्ष केल्याचे सांगितले.बैठकीत शिरपूर साखर कारखाना (शिसाका) बचाव समिती स्थापन करण्याचा निर्णय घेण्यात आला.  या बैठकीला शेतकरी विकास फाऊंडेशनचे मोहन साहेबराव पाटील, एड.गोपालसिंग राजपूत, शिवाजीराव बोरसे,भाकपचे एड.हिरालाल परदेशी,कॉ.अर्जुनदादा कोळी, मानव एकता पक्षाचे कल्पेशसिंह जमादार,ओंकार आबा जाधव,राष्ट्रवादीचे हेमराज राजपूत,शिवसेना जिल्हा उपप्रमुख भरतसिंह राजपूत,मनोज धनगर, जनजागृती समितीच्या डॉ. सरोज पाटील, नानाभाऊ पाटील हिंगोणी, हितेंद्रसिंग राजपूत, प्रेमसिंग चौधरी इ. वक्त्यांनी या बैठकीला संबोधित केले.  

या बैठकीला शिसाका सभासद, कामगारांसह विविध राजकीय पक्षांचे पदाधिकारी,शेतकरी,मजूर,व कार्यकर्ते मोठ्या संख्येने उपस्थित होते.आगामी काळात शिसाका बचाव समिती स्थापन करून जनजागृति आंदोलनाशी संबंधित सर्व निर्णय घेण्याचे अधिकार समितीला देण्यात आले आहेत.लवकरच समिती आपल्या कार्यक्रमाची रुपरेषा जाहीर करणार आहे.