महाड औद्योगिक क्षेत्रातील पंचतारांकित औद्योगिक वसाहतीमध्ये गेली अनेक वर्ष कार्यरत असलेले हेलीपॅड एका खाजगी रासायनिक कंपनीला देण्यात आलेल्या जमिनीमध्ये विकण्यात आले आहे. यामुळे गेली कांही महिन्यापासून या हेलीपॅडचा ताबा कंपनीकडे होता. मात्र एका कंपनीच्या उद्घाटनाच्या निमित्ताने ना. शरद पवार हे महाड औद्योगिक क्षेत्रात येणार असल्याने हे हेलीपॅड पुन्हा खुले करण्यात आल्याने आश्चर्य व्यक्त केले जात आहे.
महाड औद्योगिक क्षेत्रातील अतिरिक्त औद्योगिक वसाहतीमध्ये पंचतारांकित औद्योगिक क्षेत्र उभे राहणार होते. याठिकाणी भूमिगत विद्युत व्यवस्था, पदपथ, हेलिपॅड, दूरध्वनी, पाणीपुरवठा योजना, पोलीस चौकी, आदी कामांचा आणि सुविधांचा यामध्ये समावेश होता. या क्षेत्राकरिता सन १९९९ पर्यंत जवळपास १३३२.४६ लक्ष खर्च करण्यात आला. हे हेलिपॅड गेली अनेक वर्ष वापरात आले. मात्र पंचतारांकित औद्योगिक क्षेत्रात शासनाने स्वारस्य न दाखवल्याने हे क्षेत्र ओसाडच राहिले आहे. यामुळे पंचतारांकितचा दर्जा शासनाने काढून टाकल. यामुळे कांही महिन्यापूर्वी हे हेलिपॅड देखील या परिसरात येणाऱ्या ओरिएन्ट अॅरोमॅटीक अॅन्ड सन्स लिमिटेड कंपनीला विकण्यात आले आहे. याठिकाणी कंपनीचे काम सुरु करण्यात आले आहे. यामुळे कंपनी प्रशासनाने हेलिपॅड च्या जागी कंटेनर टाकून तात्पुरत्या स्वरूपातील कार्यालय उभे केले होते. आज दिनांक ८ जानेवारी रोजी येथे नव्याने उभी राहत असलेल्या अॅस्ट्ाईड लाइफ सायन्सेस या कंपनीच्या उद्घाटनाला राष्ट्रवादी कॉंग्रेस पक्षाचे अध्यक्ष ना. शरद पवार येणार असल्याने हे हेलिपॅड पुन्हा सुरु केले आहे. येथील कंटेनर हटवण्यात आले आणि पूर्वीचे हेलिपॅड पुन्हा खुले करून एकाच दिवसाकरिता हेलिपॅड वर हेलिकॉप्टर उतरवण्यात येणार आहे.
याबाबत महाड औद्योगिक विकास महामंडळाचे विभागीय कार्यालयाचे माधव पाटील यांनी दिलेल्या माहितीनुसार जी जागा ओरिएन्ट अॅरोमॅटीक अॅन्ड सन्स लिमिटेड कंपनीला दिली आहे त्या जागेतच हे हेलिपॅड अस्तित्वात होते. यामुळे औद्योगिक विकास महामंडळाने हे हेलिपॅड या जागेसह वाटप केले आहे. यामुळे आता हेलिकॉप्टर उतरवण्यास देण्याचा अधिकार हा त्या कंपनीचा असल्याने त्यांच्याकडूनच आता परवानगी दिली असावी असे सांगण्यात आले आहे.
ना.शरद पवार हे देशपातळीवरील नेतृत्व आहे. राजकीय क्षेत्रातील एक दिग्गज नेत्यांमध्ये त्यांचे स्थान पहिल्या क्रमांकाचे आहे. त्यामुळे त्यांच्या सुरक्षेच्या दृष्टीने देखील महत्वाची काळजी स्थानिक प्रशासनाला घेणे आवश्यक आहे. ज्या ठिकाणी हेलिपॅड आहे त्याठिकाणी कंपनीचे काम सुरु असून खाजगी कार्यालयाचे कंटेनर देखील तिथेच ठेवले आहे. यामुळे स्थानिक महसूल प्रशासन, औद्योगिक विकास महामंडळ, आणि पोलीस प्रशासन याठिकाणी कायम लक्ष देवून आहेत.
तरुण गर्जना वृत्तपत्र सह
चंद्रशेखर अहिरराव धुळे
कोणत्याही टिप्पण्‍या नाहीत:
टिप्पणी पोस्ट करा