अमळनेर-प्रतिनीधी:- स्थानिक स्वराज्य संस्थांमध्ये पालिका ही महत्वाची असते. मला अनेक जण विकासाच्या बाबतीत सांगतात, की शिरपूरला जाऊन बघा, बारामतीला जाऊन बघा, संगमनेरला जाऊन बघा. मात्र, तेथील संस्थांनी तेथील नेत्यांना एकहाती सत्ता सोपवली आहे. त्यामुळेच तेथील विकास झाला आहे. यासाठी तुम्ही आमच्या शहर विकास आघाडीला एकहाती सत्ता द्या. मग अमळनेरचा विकास कसा होतो ते बघा, असे आवाहन माजी मंत्री तथा आमदार अनिलदादा पाटील यांनी केले.
येथील श्री छत्रपती शिवाजी महारा नाट्यगृहामध्ये शुक्रवार, दि. 28 रोजी रात्री झालेल्या विविध व्यापारी संघटनांच्या मेळाव्यात ते बोलत होते. खासदार स्मिताताई वाघ अध्यक्षस्थानी होत्या. माजी आमदार कृषिभुषण साहेबरावदादा पाटील, माजी नगराध्यक्षा सौ. जयश्रीताई पाटील, बांधकाम व्यावसायिक ओमप्रकाश मुंदडा, सरजूशेट गोकलाणी, रामदास निकुंभ (नाना) खानदेश शिक्षण मंडळाचे संचालक हरी भिका वाणी, प्रदीप अग्रवाल, व्यापारी संघटनेचे अध्यक्ष जेठमल जैन, भाजपचे जिल्हा उपाध्यक्ष लालचंद सैनानी, राष्ट्रवादी काँग्रेसचे शहराध्यक्ष मुख्तार खाटीक, शविआचे नगराध्यक्षपदाचे उमेदवार जितेंद्र ठाकूर व नगरसेवकपदाचे सर्व उमेदवार व्यासपीठावर उपस्थित होते.
आमदार अनिलदादा पाटील पुढे म्हणाले, की पालिका निवडणुकीच्या प्रचाराचा अंतीम टप्पा सुरू आहे. आमच्या निवडणुकीकरीता जेवढा आम्ही प्रयत्न करतो, त्याच्या दहा पट ताकदीने आम्ही शविआच्या उमेदवारांना निवडून आणण्यासाठी प्रयत्नशील आहोत. प्रभागनिहाय विचार केला तर सर्वच जाती- धर्माच्या लोकांना आम्ही उमेदवारी आम्ही दिली आहे. मग जातीवाद कुठुन आला? उमेदवारामधील कामाची चुणूक पाहून आम्ही उमेदवारी दिली आहे. नगराध्यक्षपदाच्या उमेदवारीबाबत जेव्हा विचार झाला तेव्हा आम्ही कसोटीत उतरलो होतो. जितेंद्र ठाकूर यांना उमेदवारी देताना समिती नेमण्यात आली होती. सर्वांचा एकमुखी निर्णय होऊन श्री. ठाकूर यांना उमेदवारी दिली आहे. श्री. ठाकूर यांचे बोलताना काही चुकले असेल माफ करावे, असे म्हटलेे. हा त्यांच्या मनाचा मोठेपणा आहे. जैन समाजबांधवांमध्ये म्हटले जाते, की ‘माफी मागने वाला वीर होता है.. और माफ करने वाला महावीर होता है!’ मी सुध्दा कधी कधी ‘मिच्छामी दुक्कडम’ असे म्हणतो. एकच व्हीजन ठेऊन आम्ही चालणारे आहोत. ‘आमची माणसे, आमचे गाव आणि आमचा विकास’ हे ब्रिद घेऊन आम्ही चालत आहोत. उमेदवार तुमच्या घरातील आहेत. तुमच्या परिवारातील आहेत. तुमच्या दारासमोर लहानाचे मोठे झालेले कार्यकर्ते आहेत. बाहेरुन उचलून आणलेला आहे आणि तुमच्या दारासमोर उभा केलेला माणुस आम्ही दिलेला नाही. नगराध्यक्ष व तुमच्या प्रभागातील नगरसेवक हा सत्तेतला असला पाहिजे. तरच विकासकामे करणे शक्य असते. शहराचा, तालुक्याचा व जनतेचा विचार करून शहर विकास आघाडीच्या सर्व उमेदवारांना विजयी करा, असेही आवाहन आमदार अनिलदादा पाटील यांनी केले. शरद सोनवणे यांनी सूत्रसंचालन केले. रणजित शिंदे यांनी आभार मानले. खासदासर स्मिताताई वाघ म्हणाल्या, की अमळनेरच्या जनतेने गेल्या पाच वर्षात विकास पाहिलेला आहे. माजी आमदार कृषिभुषण साहेबरावदादा पाटील, आमदार अनिलदादा पाटील यांनी मोठी विकासकामे केली आहेत. मी खासदार म्हणून केंद्रात, तर अनिलदादा राज्यात आहेत. त्यामुळे चिंता करण्याचे कारण नाही. शहराच्या विकासासाठी डीपी रोड होणे आवश्यक होते. सर्व प्रशासकीय कार्यालयही एकाच छताखाली आणून अनिलदादांनी जनतेला दिलासा दिला आहे. माजी आमदार साहेबरावदादा पाटील म्हणाले, की अमळनेर पालिकेच्या इतिहासात अनेक जाती- धर्मांचे लोक हे नगराध्यक्ष झालेले आहेत. अमळनेरची जनता उदार आहे. त्यांनी कधीही जात पात धर्म पाहिला नाही. ज्याप्रमाणे आपण आपल्या आईची सेवा करतो, त्याचप्रमाणे पालिकेलाही आई समजावे. सर्वांगीण विकासासाठी शविआच्या हाती एकहाती सत्ता द्यावी. माजी नगराध्यक्षा जयश्रीताई पाटील म्हणाल्या, की 9 वर्षांनंतर पालिकेची निवडणूक होत आहे. गेल्या चार वर्षांपासून पालिकेवर प्रशासक होते. मात्र, आमदार अनिलदादा पाटील यांनी नारिकांची गैरसोय होऊ दिली नाही. विकासकामे सुरूच होती. बाजारपेठेतील रस्ते दर्जेदार झाले आहेत. एकही खड्डा रस्त्यावर दिसणार नाही. जळगावहून आलेल्या उमेदवाराला आपण निवडून दिले तर आपल्याला त्याला भेटायला जळगावला जावे लागेल.
शविआचे सर्व उमेदवार रत्न आहेत. त्यांना पारखूनच उमेदवारी दिली आहे. रामदास निकुंभ म्हणाले, की आठवडे बाजारातील फायनल प्लॉट 123मध्ये अतिक्रमण होते. आमदार अनिलदादा पाटील यांनी अतिक्रमणधारकांना विश्वासात घेतले. सामंजस्यातून त्यांनी हे अतिक्रमण काढून भव्य व्यापारी संकुल उभारले आहे. त्यामुळे पालिकेची आर्थिक स्थिती सुधारणार आहे. शविआच्या नेत्यांकडे विकासाचे व्हिजन आहे. त्यांच्या नेतृत्वाखालील शविआला सर्वांनी साथ द्यावी. ओमप्रकाश मुंदडा म्हणाले, की अनिलदादा हे उपमुख्यमंत्री अजित पवार यांचे निकटवर्तीय आहेत. त्यांच्या माध्यमातून सुमारे 4 हजार कोटींची कामे अमळनेर शहरासह मतदारसंघात झाली आहेत. जिल्ह्यात सर्वाधिक कामे अमळनेरमध्ये झाली आहेत. चांगल्या रस्त्यांमुळे प्रदूषण कमी होण्यास मदत झाली आहे. सर्व सुख सुविधा झाल्याने प्लॉट, फ्लॅट व रो हाऊसेस घेणाऱ्या ग्राहकांची संख्याही वाढली आहे. ॲड. राजेंद्र निकम म्हणाले, की पाच- सहा वर्षांपूर्वी अमळनेर कसे होते व आता कसे आहे, हे आपल्या डोळ्यासमोर आहे. शहर व तालुक्यात दर्जेदार रस्ते झाले आहेत. क्रीडा संकुलामुळे तरुणांची सोय झाली आहे. बोरी नदीवरील पुलामुळे वाहतुकीची समस्या दूर झाली आहे. श्री मंगळ ग्रह मंदिर भारतात प्रमुख पर्यटन स्थळांपैकी एक बनले आहे. रेल्वे स्थानकही सर्व सोयी- सुविधांनी सुसज्ज झाले आहे. पाडळसे धरणाचे कामही मार्गी लागल्याने शेतकऱ्यांमध्ये आनंद आहे.
कोणत्याही टिप्पण्‍या नाहीत:
टिप्पणी पोस्ट करा