अमळनेर प्रतिनीधी:- अमळनेर येथिल 'सीसीआय' कापूस खरेदी केंद्रास मंजुरी मिळाल्याने परिसरातील कापूस उत्पादक शेतकऱ्यांमध्ये समाधानाचे वातावरण आहे. मंगळवार, दि. २५ नोव्हेंबर रोजी सकाळी पिंपळे रस्त्यावरील लामा जिनमध्ये सदर केंद्राचा प्रारंभ शेतकऱ्यांच्या हस्ते होणार आहे.
अमळनेर येथे सीसीआय कापूस खरेदी केंद्र नसल्याने शेतकऱ्यांमध्ये प्रचंड नाराजी होती. शेतकऱ्यांना कापूस विकण्यासाठी इतरत्र जावे लागत होते. त्यामुळे अमळनेर येथेच सीसीआय कापूस खरेदीकेंद्र सुरू व्हावे, यासाठी कृषी उत्पन्न बाजार समितीने शासनाकडे लोकप्रतिनिधी यांचेमार्फत पाठपुरावा केला होता.माजी मंत्री आ. अनिल पाटील,खासदार श्रीमती स्मिता वाघ यांच्या पुढाकाराने अखेर अमळनेर येथे सीसीआय कापूस खरेदी केंद्रास मंजुरी मिळाल्याने शेतकऱ्यांना दिलासा मिळाला आहे. शेतकऱ्यांनी सदर केंद्राचा लाभ घ्यावा, असे आवाहन बाजार समितीचे सभापती अशोक पाटील, उपसभापती सुरेश पाटील,संचालक मंडळ व सचिव डॉ. उन्मेशकुमार राठोड यांनी केले आहे.
शेतकऱ्यांनी पुढील नियमांचे पालन करून कापूस विक्रीस आणावा, असे आवाहन बाजार समितीतर्फे करण्यात आले आहे.सीसीआयच्या अधिकृत पोस्टर समोर शेतकऱ्यांना फोटो काढणे अनिवार्य आहे. त्यामुळे शेतकरी स्वतः खरेदी केंद्रावर हजर राहाणे बंधनकारक आहे. ८ ते १२ टक्के आर्द्रता असलेला, काडी कचरा व कवडी विरहीत कापूसच खरेदी केंद्रात खरेदी केला जाईल. खराब कापूस, ओला कापूस खरेदी केंद्रावर आणू नये. ज्या दिवशी पाऊस असेल त्या दिवशी खरेदी केंद्र बंद राहील. स्लॉट बुकिंग केल्याशिवाय वाहन केंद्रावर आणू नये. नाव नोंदणी केलेल्या शेतकऱ्यांची कागदपत्रे तपासून मंजुर झालेल्या शेतकऱ्यांनाच स्लॉट बुक करता येईल. शेतकऱ्यांच्या कागदपत्रांमध्ये त्रुटी आढळल्यास त्याबाबतचा मॅसेज शेतकऱ्याच्या मोबाईलमध्ये कपास किसान अॅप ओपन केल्यावर दिसेल. त्याप्रमाणे कागदपत्रांची पूर्तता करून पुन्हा कागदपत्रे अॅपमध्ये अपलोड करावीत. ज्या शेतकऱ्यांची नाव नोंदणी नामंजुर झाली असेल, अशा शेतकऱ्यांना स्लॉट बूक करता येणार नाही. यासाठी शेतकऱ्यांनी नव्याने नाव नोंदणी करावी. प्रत्येक दिवशी स्लॉट ओपन होणार असून, कपास किसान अॅपवरून नाव नोंदणी केलेल्या शेतकरी बांधवांनी आपल्या सोयीनुसार विक्रीची तारीख बूक करावी. शेतकऱ्यांनी नियमांचे पालन करून कापूस विक्रीस आणावा, असे आवाहन बाजार समितीतर्फे करण्यात आले आहे.
"शेतकऱ्यांना त्यांचा कापूस आता हमीभावाने विक्री करता येणार आहे. सीसीआयने ठरवून दिलेले नियमानुसार शेतकऱ्यांनी कापूस केंद्रावर आणावा. जास्तीत जास्त शेतकऱ्यांनी बुकींग करून सीसीआय कापूस खरेदी केंद्राचा लाभ घ्यावा."
अशोक पाटील, सभापती,
कृषी उत्पन्न बाजार समिती, अमळनेर.
कोणत्याही टिप्पण्‍या नाहीत:
टिप्पणी पोस्ट करा