नववर्षाच्या स्वागतासाठी शहर व परिसरात ‘थर्ड फर्स्ट’च्या रात्री सार्वजनिक शांततेचा भंग करणाऱ्या, धिंगाणा घालणाऱ्या तसेच कायदा-सुव्यवस्था बिघडविणाऱ्या व्यक्तींविरोधात कडक कारवाई करण्यात येणार असल्याचा स्पष्ट इशारा पोलिस प्रशासनाने दिला आहे. सर्व पोलीस ठाण्यांच्या हद्दीत विशेष नाकाबंदी, गस्त आणि तपासणी मोहिम राबविण्यात येणार आहे.
नववर्षाच्या पार्श्वभूमीवर शहरातील चौकाचौकांत, प्रमुख रस्त्यांवर तसेच संवेदनशील ठिकाणी पोलिसांचा बंदोबस्त वाढविण्यात आला आहे. रात्रीच्या वेळी संशयास्पद हालचाली करणाऱ्या वाहनचालकांची कसून चौकशी केली जाणार असून मद्यप्राशन करून वाहन चालविणाऱ्यांवर कठोर कारवाई होणार आहे.
अवैध धंदे आणि जुगार अड्ड्यांवर कारवाई
महाराष्ट्र दारूबंदी कायद्यानुसार तसेच जुगार प्रतिबंधक कायद्यानुसार अवैध दारू विक्री, जुगार अड्डे, बिंगो पार्टी, पत्ते खेळ यांवर छापे टाकून कारवाई करण्यात येणार आहे. यापूर्वी गुन्हे दाखल असलेल्या व्यक्तींवर विशेष लक्ष ठेवण्यात येणार असून पुनरावृत्ती केल्यास कठोर शिक्षा होणार आहे.
रात्रीची गस्त, नाकाबंदी कडक
महाराष्ट्र पोलीस कायदा कलम १३२ अंतर्गत संशयास्पद व्यक्ती, वाहनांची तपासणी केली जाणार आहे. रात्री उशिरा अनावश्यक फिरणाऱ्यांवर तसेच सार्वजनिक ठिकाणी गोंधळ घालणाऱ्यांवर दंडात्मक कारवाई करण्यात येईल. गुन्हेगारी तडीपार
शहरातील कायदा-सुव्यवस्था अबाधित राखण्यासाठी धुळे जिल्ह्यातील विविध पोलीस ठाण्यांच्या हद्दीतील एकूण १७ गुन्हेगारांना तडीपार करण्यात आले आहे. नववर्षाच्या काळात कोणताही अनुचित प्रकार घडू नये, यासाठी पोलीस प्रशासन सज्ज आहे.
पोलीस प्रशासनाचा इशारा नववर्ष आनंदात, शांततेत आणि सुरक्षिततेत साजरे करावे. कायद्याचे उल्लंघन करणाऱ्यांवर कोणतीही तडजोड न करता कठोर कारवाई केली जाईल, असा इशारा पोलिसांनी दिला आहे.
कोणत्याही टिप्पण्‍या नाहीत:
टिप्पणी पोस्ट करा