शिरपूर शहरात होणाऱ्या खंडेराव महाराज यात्रेच्या पार्श्वभूमीवर महाराष्ट्र पोलिस व शिरपूर शहर पोलिस दलाने भाविकांच्या सुरक्षिततेसाठी महत्त्वाचे आवाहन केले आहे. यात्रेदरम्यान कोणतीही अनुचित घटना घडू नये, यासाठी भाविकांनी काही आवश्यक खबरदारी घ्यावी, असे पोलिसांनी स्पष्ट केले आहे.
महिलांनी यात्रेस येताना सोने-चांदीचे मौल्यवान दागिने घालून येऊ नयेत, असे आवाहन करण्यात आले आहे. तसेच सर्व भाविकांनी आपल्या जवळ मोठ्या प्रमाणात रोख रक्कम बाळगू नये, अशी सूचनाही देण्यात आली आहे.
यात्रेसाठी येणाऱ्या भाविकांनी आपली वाहने केवळ नेमून दिलेल्या पार्किंग ठिकाणीच लावावीत व वाहने नीट लॉक करून ठेवावीत, असेही पोलिसांकडून सांगण्यात आले आहे. यात्रेत लहान मुलांसोबत येणाऱ्या भाविकांनी विशेष काळजी घ्यावी. लहान मुलांच्या खिशात पालकांचे नाव व मोबाईल क्रमांक लिहून ठेवण्याचे आवाहन करण्यात आले आहे.
यात्रेला येण्यापूर्वी घर व्यवस्थित लॉक करूनच बाहेर पडावे व शक्य असल्यास घरात एखादी जबाबदार व्यक्ती ठेवून यात्रेचा आनंद घ्यावा, असेही सूचित करण्यात आले आहे. यात्रेदरम्यान कोणताही अनुचित प्रकार घडताना दिसल्यास तात्काळ पोलिसांना कळवावे, असे आवाहन करण्यात आले आहे.
शिरपूर शहर पोलिस दलातर्फे खंडेराव महाराज यात्रेनिमित्त येणाऱ्या सर्व भाविकांना हार्दिक शुभेच्छा देण्यात आल्या असून, भाविकांनी पोलिस प्रशासनाला सहकार्य करून सुरक्षित व शांततेत यात्रा पार पाडावी, असे आवाहन करण्यात आले आहे.
कोणत्याही टिप्पण्या नाहीत:
टिप्पणी पोस्ट करा