मनसेची हजार चेष्टा झाली. मनसेला राजकीय भविष्य नाही, मनसेचे अस्तित्व संपले, असे पानभर लेख छापून आले. पण, मनसेच्या पोरांचं मनोधेर्य अजूनही खचल्याचं दिसत नाही. राज्यात मनसेसारखा धिंगाणा कोणत्याच पक्षानी घातला नाही, हे मान्यच करायला हवे. मनसेच्या अनेक मोठ्या नेत्यांनी पक्ष बदलले. आपला देव बदलला. पण, मनसेच्या पोरांच्या मनातला देव मात्र तसाच शाबूद राहिला. राज्यात भाजपची सत्ता आली, भाजप सत्तेतून गेल्यावर आघाडीची सत्ता आली. तरीही मनसेची पोरं डगमगली नाहीत. माझ्यासारखे भाजपचं कौतुक करणारे आता आघाडीचं कौतुक करु लागलेत. पण, मी भाजपचं कौतुक करत असताना मनसेचं कौतुक करणारी पोरं आज आघाडीचं सरकार येऊनही मनसेवरच ठाम आहेत, याचं कमाल कौतुक वाटतं.
मनसेचा एकमेव आमदार, सातच नगरसेवक, विकासाची ब्लू प्रिंट, लावरे तो व्हिडीओ, शॅडो मंत्रिमंडळ, बदललेला झेंडा, अशा अगणित गोष्टीतून मनसे ट्रोल झाला. प्रत्येकाने मनसेची खिल्ली उडवली. त्यामध्ये मीसुद्धा आहे. पण, आजही मनसेच्या पोरांची एकनिष्ठा पाहिली की बिघडलेल्या राजकारणाला वठणीवर आणणारी हीच खरी गँग आहे असं वाटतं. मनसे म्हणजे खळ खट्याक, मनसे म्हणजे राढा अशी या पक्षाची इमेज असली तरी मनसे म्हणजे कार्यकर्त्यांची निष्ठा हे समीकरणही आता अभिमानानं मिरवायला हवं. कारण स्वार्थासाठी बाप बदलणारी ही पोरं नाहीत, ही त्यांची निष्ठा दाखवून देते.
कोरोनानं राज्याची वाताहत झाली. काही ठिकाणी आघाडी फेल गेली तर काही ठिकाणी भाजपनं विखारी राजकारण केलं. लॉकडाऊन काढलं असलं तरी राज्य आजारी आहे. अशा परिस्थितीत मनसेच्या पोरांनी आता डरकाळी फोडायला हवी. परप्रांतीयाचा मुद्दा घेऊन या मनसेने संपुर्ण राज्य झोडपून काढलं होतं, त्याच मनसेनं बापाच्या नात्यानं या पिचलेल्या राज्याला मलमपट्टी करायला पुढं यायला हवं.
कारण आजवर मनसेच्या पोरांनी जो धिंगाणा घातलाय तसा धिंगाणा कोणत्याच पक्षाच्या कार्यकर्त्यांनी घातला नाही, हे विसरुन चालणार नाही.
पुनमचंद मोरे
धुळे जिल्हा उपाध्यक्ष
महाराष्ट्र नवनिर्माण विद्यार्थी सेना
आपल्यापर्यंत बातमी देण्यासाठी काय करावे लागेल
उत्तर द्याहटवा