अचूक भविष्यवाणी करणारे गृहस्थ म्हणून किरीट सोमय्यांची महाराष्ट्रात नवी ओळख निर्माण होत आहे. - ना. जयंत पाटील

आज प्रसारमाध्यमांशी बोलताना जलसंपदा मंत्री ना. जयंत पाटील यांनी केंद्रीय तपास यंत्रणांचा गैरवापर होत असल्याची टीका केली. शिवसेना खासदार संजय राऊत यांना जप्तीबद्दल आधी कल्पना द्यायला हवी होती. एकंदरीतच या सर्व प्रकरणातून संजय राऊत यांच्यावर दबाव आणण्याचा प्रयत्न होत आहे. दोन दिवसांपूर्वी सर्वोच्च न्यायालयानेसुद्धा ईडीच्या कारवायांबद्दल प्रश्नचिन्ह उपस्थित केले आहे. त्यामुळे तपास यंत्रणांचा गैरवापर होत असल्याचे जगजाहीर आहे, असे जयंत पाटील म्हणाले.

किरीट सोमय्या जे काही वक्तव्य करतात त्या घटना आगामी दोन-चार दिवसांमध्ये घडतात. त्यामुळे अचूक भविष्यवाणी करणारे गृहस्थ म्हणून त्यांची महाराष्ट्रात नवी ओळख निर्माण होत आहे. केंद्रीय तपास यंत्रणा आपल्या कामाचा अहवाल नेहमी किरीट सोमय्यांना देत असतात असा एक आभास निर्माण झाला आहे, असे ते म्हणाले.

या कारवायांमुळे महाविकास आघाडी सरकारवर परिणाम होण्याचा प्रश्नच उद्भवत नाही, असेही त्यांनी स्पष्ट केले. सरकार व सरकारशी संबंधित लोकांची बदनाम करण्याचा प्रयत्न होत आहे आणि त्यांच्याबद्दल संशय निर्माण करण्यासाठी केंद्रीय तपास यंत्रणांचा वापर होत असल्याचे चित्र आहे, असे त्यांनी सांगितले.

तरुण गर्जना वृत्तपत्र सह

चंद्रशेखर अहिरराव धुळे