तरुण गर्जना वृत्तपत्र

वासखेडी येथे 111 वृक्षांचा वाढदिवस वृक्षदिंडीने संपन्न

नविन 260 वृक्षांची लागवड

साक्री- तालुक्यातील वासखेडी येथे नुकताच 111 वृक्षांचा वाढदिवस वृक्षदिंडीने  तर नवीन 260 वृक्षलागवड कार्यक्रम उत्साहात संपन्न झाला.

वासखेडी हे गाव माळमाथा परिसरातील  साधरणतः 4 ते 5 हजार लोकसंख्येच एक लहानसे गाव आहे. पावसाळा कितीही झाला तरी निचरा करुन न ठेवणारी जमीन असल्यामुळे नेहमीच दुष्काळाला सामोरे जावे लागते. दुष्काळाचे एकमेव कारण म्हणजे वृक्षतोड , पर्यावरणाचा ऱ्हास. हाच मुद्दा डोळ्यासमोर ठेवून गावातील तसेच गावाच्या बाहेर नोकरी निमित्ताने गेलेला तरुण वर्ग यांनी एकत्र येत पर्यावरण संवर्धनाचा ध्यास घेत सन 2021 साली ग्राम विकास मंच अंतर्गत  एक वृक्ष प्रगतीचा ' ही चळवळ उभी केली. एकत्र येऊन हा ग्राम विकास मंच स्थापन केला. प्रथम वर्षी 111 वृक्षांची लागवड व संवर्धन करत दरवर्षी गावात 18 जुलै रोजी वृक्षारोपण महोत्सव व वृक्ष संवर्धन शपथ कार्यक्रम साजरा करण्याचे निश्चित केले. यानुसार भजनी मंडळ व गावकऱ्यांच्या सहकार्याने गावातुन वृक्षदिंडी काढून व प्रत्येक झाडाचे पुजन करुन वाढदिवस साजरा करण्यात आला.

 ह्या टीम ने गेल्या वर्षी गावापासून ते अमरधाम पर्यंत 111 वृक्षांची लागवड केली. यात सर्वच्या सर्व वृक्षांचे संवर्धन झाले. या वृक्षांचा वाढदिवस मोठ्या उत्साहात साजरा करुन नविन 260 वृक्षांची लागवड करण्यात आली. या तीन दिवसीय उत्सवात सर्व दाते वृक्षसेवक, सर्वजण आपापली कामे तीन  दिवस बाजुला ठेऊन कुठल्याही कामांची लाज न बाळगता आपलं सर्वस्व झोकुन काम करत होते. प्रत्येक जण कुणी डॅाक्टर,  मोठमोठे व्यावसायीक, इंजीनिअर यांचेसह  सर्व कष्टकरी शेतकरी वर्ग, तरुण मित्रमंडळ, जेष्ठ नागरीक, वारकरी संप्रदाय, महीला माता भगीनी, दोन्ही शाळेतील सर्व शिक्षक व शिक्षकेतर कर्मचारी व बाल गोपाल विद्यार्थी यांनीही मेहनत घेतली. 

गावाच्या प्रवेश रस्त्यावर 260 आशीर्वाद वृक्षांची लोखंडी जाळीसहित लागवड केली. या टीमने निंब, वड, पिंपळ, अशी 100 टक्के ऑक्सिजन देणारीच वृक्ष लागवडीस घेतली आहेत जेणेकरून गावातील वातावरण हवा शुद्ध राहण्यास मदत होईल एक वृक्ष प्रगतीचा वासखेडी टीमने गावातील, नोकरी निमित्त बाहेरगावी असलेले तसेच मित्रपरिवार अशा पर्यावरण प्रेमी कडून आपल्या आवडत्या व्यक्तीच्या स्मरणार्थ, वाढदिवस,  लग्नाचा वाढदिवस, कन्यावृक्ष अशा विविध निमित्ताने प्रत्येकी एका वृक्षासाठी 1100 रुपये देणगी घेतली जाते व त्या वृक्षांचे पुढील पालकत्व हि टीम पूर्णपणे सांभाळत असते. तो वृक्ष 100 टक्के जगवून दाखवतो. त्यामुळे वृक्ष लागवड करण्याचा दृष्टीकोन  साध्य होतो व देणगी देणारे दात्यांना समाधान लाभते.  यावेळी सर्व वृक्षदात्यांना वृक्षसेवकांच्या हस्ते सन्मान पत्र देऊन गौरविण्यात आले.

 तरुण गर्जना वृत्तपत्र सह

चंद्रशेखर अहिरराव धुळे