नंदुरबार प्रतिनिधी : आगामी स्वराज्य संस्थांच्या निवडणुकीपूर्वीच भाजपा व शिंदे शिवसेनेत जुंपल्याचे चित्र आहे. 'लाभार्थ्यांना गृहोपयोगी वस्तूंचे वाटप शांततेत चालू असताना कोणीतरी लोकप्रतिनिधींनी येऊन त्यांचे माथे भडकवणे चूक आहे. आम्ही लोकांसाठी ज्या ज्या वेळी योजना आणल्या. त्या त्यावेळी त्या बंद पाडण्याचा प्रयत्न केला, अशा लोकांना दखल घेण्याचा अधिकार नाही.योजना शासनाच्याच असतात हे खरे आहे. परंतु त्या लोकांपर्यंत देण्याची नैतिकता नेत्यांमध्ये असावी लागते. जिल्ह्यामध्ये असा एक पुढारी दाखवून द्या, ज्याने नवीन काही योजना आणली आहे आणि लोकांना लाभ दिला आहे,' अशा शब्दांत माजी मंत्री तथा आमदार डॉ. विजयकुमार गावित यांनी शिंदे शिवसेनेचे आमदार चंद्रकांत रघुवंशी यांच्यासह विरोधकांवर शाब्दिक हल्ला चढवला आहे.
गावित म्हणाले, डॉ. सुप्रिया गावित, डॉ.हिना गावित आणि आम्ही कायमच वेगवेगळ्या योजना आणत असतो लोकांना लाभ देत असतो. मात्र हे घरी झोपून राहतात योजना कशा येतील? असा प्रश्न करून डॉक्टर गावित पुढे म्हणाले, आम्ही ज्या ज्या वेळी योजना आणल्या त्या बंद पाडण्याचाच प्रयत्न यांनी केला. शेतकऱ्यांसाठी विहीर वाटप सुरू केले, यांनी तक्रार करून बंद केले. शेतकऱ्यांना शेळी मेंढ्या वाटप सुरू केले, तर खोटे दाखले जोडतात सांगून तक्रारी केल्या. आदिवासींसाठी गाय वाटपाची योजना आणली, तर ती सुद्धा खोट्या तक्रारी करून यांनी बंद पाडली. अशा लोकांना येथे वाटपाच्या ठिकाणी येऊन लाभार्थ्यांना शिकवण्याचा अधिकार नाही, असे शब्दांत गावितांनी फटकारले.
कोणत्याही टिप्पण्या नाहीत:
टिप्पणी पोस्ट करा