शिरपूर/ प्रतिनिधी शासनाच्या भूमी अभिलेख विभागात नोकरी मिळवून देण्याचे आमिष दाखवून आणि विश्वास संपादन करून धुळे,नंदुरबार जिल्ह्यातील असंख्य बेरोजगार तरुणांना लाखो रुपयांचा गंडा घालण्यात आल्याची कैफियत काही तरुणांनी मांडून या कथित टोळीचे खरे रूप समोर आणले आहे.तरुणांना फसविणारी ही टोळी त्यांचे कारनामे बाहेर येण्यापूर्वी धुळ्यातून पसार झाली आहे.भूमी अभिलेख विभागात कार्यरत धुळे येथील मुख्य अधिकारी या आर्थिक फसवणूक प्रकरणात सामील असून टोळी शोधण्याचे मोठे आव्हान पोलिसांसमोर उभे राहिले आहे.
धुळे येथील जुने जिल्हाधिकारी कार्यालय आवारात सदर कार्यालय सुरू करण्यात आले होते.तेथून भूमी अभिलेख विभागात नोकरी देण्याचे काम काही मंडळी चालवीत होती.
कार्यालयाचा थाटमाट पाहून बेरोजगार युवक नोकरी मिळेल यासाठी आकर्षित होत असत.त्यासाठी अनेकांनी संपर्क साधला.मात्र कालांतराने फसवणूक झाल्याचे लक्षात येताच धुळे,साक्री,
शिरपूर,दोंडाईचा,नंदुरबार जिल्ह्यातील काही तरुणांनी न्याय मिळावा यासाठी दैनिक तरुण गर्जना कार्यालयाशी संपर्क साधून त्यांच्यावर ओढवलेल्या प्रसंगाची माहिती त्यांनी कथन केली.
शासनाच्या भूमी अभिलेख विभागात कंत्राटी पद्धतीने नोकर भरती निघाली असल्याचे समजल्याने धुळे,नंदुरबार जिल्ह्यातील तरुणांनी धुळे येथे असलेल्या कार्यालयात संपर्क साधला.
तेथील भीमाशंकर पारधी याने या तरुणांना नोकरी देण्याचे आश्वासन दिले.मात्र त्यासाठी प्रत्येकी साडे तीन लाख रुपये भरावे लागतील असे सांगितले.त्यानुसार काही तरुणांनी रक्कम जमा केली.पारधी याने नोकरी देण्याचा ठेका घेतलेल्या उत्तम भैरू पाटील यांच्याशी बोलणे करून दिले होते.दोघांच्या सांगण्याप्रमाणे रक्कम दिल्यावर तरुणांना सातारा जिल्ह्यातील कोडोली याठिकाणी दोन महिन्यांचे प्रशिक्षण देण्यात आले.प्रशिक्षण पूर्ण केल्यावर त्यांना कोणतेही प्रमाणपत्र देण्यात आले नाही.धुळे येथे त्यांना पाठविण्यात आले.त्याठिकाणी त्यांना नोकरी बाबत निरोप मिळाला नाही.त्यांनी पारधी याच्याशी भेट करून विचारणा केल्यावर त्याने उडवा उडवी केली.मात्र आपले बिंग फुटू नये यासाठी तरुणांना धुळे येथील हॉटेल तरंग येथे असलेल्या केंद्रात नियुक्ती दिली.या तरुणांनी काम केले.त्यांनी पुन्हा नियुक्ती पत्र देण्याबाबत विचारणा केली असता सध्या जागा पूर्ण भरलेल्या आहेत.काही जागा रिक्त झाल्या की तुम्हाला लावले जाईल असे सांगून वेळ मारून नेली.या दरम्यान भूमी अभिलेख अधिकारी वाघ,गिरिजा भांड हे येत असत.काही महिने या तरुणांनी काम केले मात्र त्यांना कोणताही मोबदला देण्यात आला नाही.याबाबत चौकशी केली असता वेबसाईट बंद असल्याचे कारण पुढे करण्यात आले.त्यानंतर या केंद्रात जाऊन पाहिले असता तेथे काम सुरू असल्याचे लक्षात आले असे या तरुणांनी सांगितले.तरुणांना भूमी अभिलेख विभागात नोकरी देण्यासाठी संशयित उत्तम भैरू पाटील( रा.सोलापूर),या विभागाचा प्रमुख अधिकारी वाघ( धुळे),भीमाशंकर पारधी(गोंदिया),गिरिजा भांड( मुंबई)
,विठ्ठल दारासिंग राठोड(पाचोरा)
,रत्नाकर थोरात( जालना) यांनी वेळोवेळी तरुणांना नोकरीचे आमिष दाखवून त्यांच्याकडून लाखो रुपये उकळले.कोणाकडून तीन,दोन लाख अशा प्रकारे रक्कम घेतल्याचे या तरुणांनी दैनिक 'तरुण गर्जना' शी बोलताना सांगितले.
या आर्थिक फसवणूक प्रकरणात धुळे,नंदुरबार जिल्ह्यातील गरीब परिवारातील बेरोजगार तरुणांचा समावेश आहे.त्यांच्या वडिलांनी मुलाला नोकरी लागेल यासाठी लाखो रुपयांची रक्कम मोठ्या परिश्रमातून उभी केली.मात्र मुलांची फसगत झाल्याचे कळताच त्यांना प्रचंड धक्का बसला आहे.तरुण मुलांचे तर स्वप्न भंगले.धुळे येथे कार्यरत असलेली ही मोठी टोळी असल्याची माहिती या तरुणांनी दिली.नियुक्ती पत्र मिळावे यासाठी वारंवार विचारणा होत असल्याने या टोळीतील भामटे सरकारी कागदपत्रे,साहित्य घेवून पसार झाले आहेत.त्यामुळे नोकरी देण्याचे काम हे निव्वळ फसवणूक करण्याचे एक षडयंत्र होते असे तरुणांनी त्यांची कैफियत मांडत असताना सांगितले.
शासनाने आमची फसवणूक केल्याप्रकरणी संशयित व्यक्तींचा शोध घेवून कायदेशीर कारवाई करावी आणि आमची लाखो रुपयांची रक्कम परत मिळवून द्यावी अशी मागणी या तरुणांनी केली आहे.
चौकट
' तरुण गर्जना ' न्यायासाठी प्रयत्नशील
या तरुणांना शासन आणि पोलिस प्रशासन यांनी योग्य न्याय द्यावा आणि बेरोजगारांना गंडा घालणाऱ्या टोळीचा पर्दाफाश करून त्यांना तुरुंगात टाकावे यासाठी दैनिक ' तरुण गर्जना ' प्रयत्नशील राहणार आहे.या प्रकरणी तात्काळ कायदेशीर कारवाई झाली नाही तर याबाबत सविस्तर वृत्तांत पुढील अंकात प्रकाशित करण्यात येईल.बघू या,पोलिस प्रशासन काय कारवाई करते?
कोणत्याही टिप्पण्‍या नाहीत:
टिप्पणी पोस्ट करा