शिरपूर/ प्रतिनिधी शिरपूर-वरवाडे नगरपरिषदेच्या हद्दीत स.नं. ६/१/ब/१/ब मध्ये स्थानिक पातळीवर माजी नगरसेवकाच्या मुलीने खुल्या जागेवर अतिक्रमण केले असून ती जागा परप्रांतीय व्यक्तीला देवून अभय दिलेले आहे .त्यामुळे ही मोक्याची जागा हडप करण्याचा छुपा डाव खेळला जात आहे.मात्र हा सारा प्रकार समोर दिसत असताना अतिक्रमण विरोधी कारवाई करण्यास नगर परिषद प्रशासन मिठाची गुळणी धरून गप्प का बसले आहे? असा प्रश्न नागरीक विचारत आहेत.गोरगरिबांना कारवाईचा बडगा दाखविणारे नगर परिषद अधिकारी आता का कारवाई करण्याची धमक दाखवीत नाही?या अतिक्रमणामुळे कॉलनीतील रहिवाशांना मोठा त्रास सहन करावा लागत आहे.याबाबत वारंवार तक्रारी करूनही नगरपरिषद प्रशासन यावर कोणतीही कारवाई करत नसल्याने त्यांच्या कार्यक्षमतेवर प्रश्नचिन्ह निर्माण झाले आहे.
स्थानिक नागरिकांच्या म्हणण्यानुसार माजी नगरसेवकाच्या मुलीने त्यांच्या कॉलनीतील मोकळी जागा बळकावली आहे.या अतिक्रमित जागेवर एका परप्रांतीय व्यक्तीला आश्रय देण्यात आला असून, तो या माजी नगरसेवकाच्या मदतीने जागेवर अतिक्रमण वाढवीत असल्याचा आरोप नागरिकांनी केला आहे. या व्यक्तीने सुमारे ८-१० फूट जागा बळकावून त्यावर पत्र्याचे शेड उभारले आहे, ज्यामुळे कॉलनीतील रहिवाशांना ये-जा करण्यात प्रचंड अडचणी येत आहेत. भविष्यात या जागेचा गैरवापर होण्याची भीतीही नागरिकांनी व्यक्त केली आहे.कॉलनी भागात असलेली ही मोक्याची जागा हडप केली जाण्याचा हा छुपा डाव असावा अशी शंका निर्माण झाली आहे.नगर परिषद हा प्रकार उघड्या डोळ्यांनी दिसत असताना त्याकडे का डोळेझाक करीत आहे असा नागरिकांचा सवाल आहे.
या कॉलनी परिसरातील नागरिकांनी या अतिक्रमणाविरोधात १३/०१/२०२५ आणि १३/०२/२०२५ रोजी नगरपरिषदेकडे लेखी तक्रारी अर्ज दाखल केले होते. मात्र, आजपर्यंत यावर कोणतीही कारवाई झालेली नाही.ज्यामुळे स्थानिक नागरिकांचा संताप अनावर झाला आहे.माजी नगरसेवकाच्या दबावामुळेच नगरपालिका प्रशासन कारवाई करण्यास धजावत नसावे, असा स्पष्ट आरोप नागरिक करत आहेत.
एखाद्या लोकप्रतिनिधीने किंवा त्याच्या कुटुंबीयांनी अतिक्रमण केल्यास तो नगरसेवक पदावर राहण्यास अपात्र ठरतो असे असतानाही नगरपरिषद या गंभीर बाबीकडे दुर्लक्ष का करत आहे, असा संतप्त सवाल नागरिकांनी उपस्थित केला आहे. नगर प्रशासनाने स्थानिक नेत्यांच्या दबावापुढे न झुकता, तातडीने या प्रकरणाची दखल घेऊन अतिक्रमण हटवावे, अशी मागणी नागरिकांनी लावून धरली आहे.
नगरपरिषदेने या प्रकरणात तात्काळ आणि कठोर कारवाई न केल्यास रस्त्यावर उतरून तीव्र आंदोलनाचा इशारा नगर परिषद प्रशासनाला दिलेला आहे.
चौकट
शिरपूर वरवाडे नगर परिषद हद्दीत अनेक ठिकाणी मोक्याच्या जागी काही धनदांडगे यांनी जागा बळकावून त्यावर अतिक्रमण केले आहे.परंतु अनेक वर्षे उलटून देखील प्रशासन त्यावर हातोडा पडण्याची हिमत दाखवीत नाही याचे आश्चर्य वाटते.एखाद्या राजकीय नेत्याच्या मर्जीतील व्यक्तीने अतिक्रमण केले म्हणजे त्याला नगर परिषदेची कायदेशीर मान्यता मिळते का? असा जळजळीत सवाल नागरिकांनी उपस्थित केला आहे.अशा व्यक्तींची अतिक्रमण का काढले जात नाही,त्यांच्यावर कारवाई करून गुन्हा का दाखल केला जात नाही,त्यांना राजकीय संरक्षण देण्याचे कारण काय,कोणत्या नेत्याचा दबाव आहे या प्रश्नांची उत्तरे नगर परिषद प्रशासनाने अर्थात मुख्याधिकारी यांनी जनतेला दिली पाहिजे.शहरात रहदारी ही मोठी समस्या आहे.त्यात सार्वजनिक जागा,गटारी यावरील अतिक्रमणे हा मुख्य प्रश्न आहे.मात्र प्रशासन तेथे का लक्ष केंद्रित करीत नाही? आगामी काळात हा प्रश्न गंभीर होणार असून नगर परिषदेची निवडणूक होईल त्यावेळी त्याचे उत्तर मतदार नक्कीच देवून राजकीय लोकांना हिसका दाखविण्याचे काम करतील एवढे नक्की!
भूमी अभिलेख विभागात नोकरी देण्यासाठी आमिष दाखवून तरुणांना लाखोंचा गंडा, टोळके फरार!
धुळे येथील भूमी अभिलेख विभागात कंत्राटी पद्धतीने नोकरी देण्याचे आमिष दाखवून धुळे,नंदुरबार जिल्ह्यातील अनेक बेरोजगार तरुणांना लाखोंचा गंडा घालण्यात आला.हे वास्तव काही तरुणांनी उघड करून अनेक लबाड व्यक्तींचे चेहरे समोर आणले आहे. आपले कृष्ण कृत्य बाहेर येण्यापूर्वी लाखो रुपये गोळा करणारे काही जणांचे टोळके फरार झाले आहे.
या टोळीत भूमी अभिलेख अधिकारी सहभागी आहे.ज्यांनी तरुणांची फसवणूक केली आहे अशा बदमाश लोकांची नावे आणि हाती लागलेली माहिती याचा सविस्तर तपशील ' दै.तरुण गर्जना ' च्या पुढील अंकात!
- संपादक
कोणत्याही टिप्पण्‍या नाहीत:
टिप्पणी पोस्ट करा