बेटावद प्रतिनिधी – नरडाणा पोलीस ठाण्याच्या सतर्कतेमुळे सराईत मोटारसायकल चोरांचा पर्दाफाश करण्यात आला आहे. पोलिसांनी केलेल्या या कारवाईत तब्बल १३ मोटारसायकली जप्त करण्यात आल्या असून, त्यांची एकूण किंमत अंदाजे ८ लाख ६० हजार रुपये इतकी आहे.
दि. ११ ऑगस्ट २०२५ रोजी रात्री १ ते ३ वाजेच्या दरम्यान नरडाणा येथून एमएच १८ सीडी ८६७५ क्रमांकाची मोटारसायकल चोरीला गेल्याची तक्रार दाखल झाली होती. या प्रकरणी पोलीस ठाण्यात गुन्हा क्र. १४१/२०२५, कलम ३०३(२) प्रमाणे नोंद करण्यात आली.
या गुन्ह्याचा तपास मा. पोलीस अधीक्षक श्रीकांत ढिवरे, मा. अपर पोलीस अधीक्षक अजय देवरे व मा. उपविभागीय पोलीस अधिकारी सुनील गोसावी यांच्या मार्गदर्शनाखाली पोलीस निरीक्षक निलेश मोरे यांच्या नेतृत्वाखाली सुरू होता.
तपासादरम्यान मिळालेल्या गोपनीय माहितीच्या आधारे पोलीस पथकाने तुषार अमृत खैरनार (वय २५, रा. वाघाडी, ता. शिंदखेडा, जि. धुळे) यास ताब्यात घेतले. सखोल चौकशीत त्याने होंडा शाइनसह विविध कंपनींच्या तब्बल १३ मोटारसायकली चोरी केल्याचे उघड झाले.
आरोपीचा साथीदार दिपक कैलास बागुल (रा. सुरत) हा फरार असून, या दोघांनी मिळून धुळे, जळगाव व नंदुरबार जिल्ह्यांमधील अनेक ठिकाणी मोटारसायकली चोरी केल्याची कबुली दिली आहे. आरोपी तुषार खैरनार यास अटक करण्यात आली असून फरार आरोपीच्या शोधासाठी पोलिसांचे पथक कार्यरत आहे.
या कारवाईत नरडाणा पोलीस स्टेशनचे प्रभारी निलेश मोरे, पोलीस उपनिरीक्षक रवींद्र महाले, विजय आहेर, पो. हे. कॉ. ललित पाटील, चंद्रकांत साळुंखे, विक्रांत देसले, नारायण गवळी, पो. ना. भुरा पाटील, पो. कॉ. विजय माळी, विनोद कोळी, सुरज साळवे, अर्पण मोरे, प्रशांत पाटील, सचिन बागुल यांचा विशेष सहभाग होता. पुढील तपास पो. ना. भुरा पाटील करीत आहेत.
कोणत्याही टिप्पण्या नाहीत:
टिप्पणी पोस्ट करा