शिरपूर प्रतिनिधी / शिरपूर नगरपालिकेच्या आगामी निवडणुकीच्या पार्श्वभूमीवर भारतीय जनता पक्षाला आज मोठा धक्का बसला आहे. माजी नगरसेवक हेमंत पाटील प्रसाद पाटील आणि माजी समाजकल्याण सभापती वसंत पावरा यांनी थेट उपमुख्यमंत्री एकनाथ शिंदे यांच्या उपस्थितीत शिंदे गटात जाहीर प्रवेश करून भाजपला खिंडार पाडले आहे.
या प्रवेशामुळे शिरपूरच्या स्थानिक राजकारणात प्रचंड खळबळ उडाली असून, नगरपालिकेच्या रणांगणात नव्या समीकरणांची निर्मिती होणार हे स्पष्ट झाले आहे. हेमंत पाटील आणि वसंत पावरा हे दोघेही शिरपूर शहर व तालुक्यात मजबूत जनाधार असलेले नेते मानले जातात. त्यांच्या कार्यकाळात केलेल्या सामाजिक आणि राजकीय कार्यामुळे त्यांना मोठ्या प्रमाणात जनसमर्थन मिळाले होते.
उपमुख्यमंत्री एकनाथ शिंदे यांनी या वेळी बोलताना सांगितले की, “शिंदे गट हे कार्यकर्त्यांचे आणि जनतेच्या हिताचे व्यासपीठ आहे. शिरपूरसारख्या विकासोन्मुख शहरात निष्ठावान आणि जनतेशी जोडलेले कार्यकर्ते आमच्यासोबत येत आहेत, ही सकारात्मक सुरुवात आहे.”
दरम्यान, भाजपच्या गोटात मात्र या घडामोडीमुळे संभ्रमाचे वातावरण निर्माण झाले आहे. आगामी निवडणुकीत भाजपच्या उमेदवारांच्या गणितात मोठा फेरबदल होण्याची शक्यता व्यक्त केली जात आहे. शिंदे गटाकडे शिरपूर नगरपालिकेतील अनेक विभागांतून नव्या कार्यकर्त्यांचा ओघ वाढत असून, ही निवडणूक अत्यंत चुरशीची होण्याचे संकेत स्पष्टपणे दिसत आहेत.
राजकीय जाणकारांच्या मते, हेमंत पाटील आणि वसंत पावरा यांच्या प्रवेशामुळे शिरपूरमधील भाजपचा गड आता हलायला लागला असून, आगामी काही दिवसांत आणखी काही प्रमुख चेहरे शिंदे गटात प्रवेश करण्याची शक्यता नाकारता येत नाही.
कोणत्याही टिप्पण्या नाहीत:
टिप्पणी पोस्ट करा