निवडणूक प्रक्रियेत पारदर्शकता व शिस्त राखण्यासाठी प्रशासनाकडून कडक पावले उचलण्यात येत आहेत. निवडणूक कामकाजासाठी नेमणूक करण्यात आलेली असताना आदेशांचे उल्लंघन करून गैरहजर राहणे तसेच कर्तव्यात हलगर्जीपणा केल्याप्रकरणी तब्बल १५५ कर्मचारी व अधिकाऱ्यांच्या विरोधात गुन्हा नोंदविण्यात आला आहे.
निवडणूक प्रक्रियेदरम्यान संबंधित कर्मचाऱ्यांना पूर्वसूचना देऊनही त्यांनी कामावर हजर न राहता निवडणूक यंत्रणेच्या कामकाजात अडथळा निर्माण केला. काही कर्मचाऱ्यांनी कामात जाणीवपूर्वक दिरंगाई केली, तर काहींनी पूर्णतः दांडी मारल्याचे प्रशासनाच्या निदर्शनास आले.
या प्रकारामुळे निवडणूक व्यवस्थेवर ताण निर्माण झाला असून, लोकशाही प्रक्रियेला बाधा पोहोचू नये यासाठी प्रशासनाने कठोर भूमिका घेतली आहे. संबंधित कर्मचाऱ्यांविरोधात लोकप्रतिनिधित्व अधिनियम व भारतीय दंड संहितेतील तरतुदींनुसार गुन्हे दाखल करण्यात आले आहेत.दरम्यान, प्रशासनाने स्पष्ट इशारा दिला आहे की, निवडणूक कर्तव्यात कसूर करणाऱ्यांना कोणतीही सूट दिली जाणार नाही, तसेच पुढील टप्प्यात शिस्तभंगाची कारवाई व विभागीय चौकशीही करण्यात येणार आहे.
निवडणूक ही लोकशाहीचा कणा असून, त्यात निष्काळजीपणा सहन केला जाणार नाही, असा ठाम संदेश या कारवाईतून देण्यात आला आहे.
कोणत्याही टिप्पण्या नाहीत:
टिप्पणी पोस्ट करा