शिरपूर प्रतिनिधी - निवडणूक आचारसंहितेनुसार उमेदवारांनी सादर करावयाचा निवडणूक खर्चाचा तपशील सादर करण्यासाठी दिलेली मुदत आता अंतिम टप्प्यात आली असून महिना संपण्याच्या मार्गावर आहे. तरीही अनेक उमेदवारांनी अद्याप आपला निवडणूक खर्च सादर केलेला नाही. त्यामुळे संबंधित उमेदवारांनी तात्काळ खर्चाचा संपूर्ण तपशील सादर करावा, अन्यथा त्यांच्यावर कायदेशीर व दंडात्मक कारवाई करण्यात येईल, असा कडक इशारा निवडणूक प्रशासनाकडून देण्यात आला आहे.
निवडणूक आयोगाच्या निर्देशानुसार प्रत्येक उमेदवारास प्रचार, जाहिरात, सभा, वाहन वापर, बॅनर, पोस्टर, सोशल मीडियावरील प्रचार यासह केलेल्या सर्व खर्चाचा तपशील ठराविक कालावधीत निवडणूक खर्च निरीक्षकांकडे सादर करणे बंधनकारक आहे. खर्च सादर न केल्यास अथवा चुकीचा अहवाल दिल्यास उमेदवार अपात्र ठरू शकतो, तसेच दंड व कायदेशीर कारवाईला सामोरे जावे लागू शकते. निवडणूक प्रक्रियेत पारदर्शकता राखण्यासाठी खर्च सादरीकरण अत्यंत महत्त्वाचे असून, कोणतीही दिरंगाई खपवून घेतली जाणार नाही, असेही प्रशासनाने स्पष्ट केले आहे. त्यामुळे संबंधित सर्व उमेदवारांनी दिलेल्या मुदतीत निवडणूक खर्चाचा अहवाल सादर करून संभाव्य कारवाई टाळावी, असे आवाहन करण्यात आले आहे.
कोणत्याही टिप्पण्या नाहीत:
टिप्पणी पोस्ट करा