शिरपूर शहर परिसरात रस्त्याच्या अगदी मधोमध वीज वितरणाचा खांब उभा असून तो अपघातांना खुले आमंत्रण देत आहे. या धोकादायक खांबामुळे वाहनचालकांना व पादचाऱ्यांना मोठा अडथळा निर्माण होत असून, कोणत्याही क्षणी भीषण अपघात घडण्याची शक्यता नाकारता येत नाही.
रस्त्याचे काम पूर्ण करूनही वीज खांब हलवण्यात आलेला नाही. हा खांब जणू प्रशासनाच्या निष्काळजीपणाचा जिवंत पुरावा ठरत आहे. विशेषतः रात्रीच्या वेळी हा खांब नीट न दिसल्याने दुचाकीस्वार व चारचाकी वाहनांना थेट धोका निर्माण होत आहे. लहान मुले, ज्येष्ठ नागरिक आणि शाळकरी विद्यार्थी या मार्गावरून नियमित ये-जा करतात, त्यामुळे संभाव्य दुर्घटनेची भीती नागरिकांतून व्यक्त होत आहे.
या गंभीर प्रकाराकडे संबंधित यंत्रणांनी जाणीवपूर्वक दुर्लक्ष केल्याचा आरोप स्थानिक नागरिक करत आहेत. “अपघात झाल्यावरच प्रशासन जागे होणार का?” असा संतप्त सवाल नागरिकांकडून उपस्थित केला जात आहे. रस्त्याच्या मध्यभागी वीज खांब ठेवणे म्हणजे नागरिकांच्या जीवाशी थेट खेळ असून, हा प्रकार कोणत्याही निकषात बसणारा नाही.
सदर खांब तातडीने सुरक्षित ठिकाणी स्थलांतरित न केल्यास, भविष्यात घडणाऱ्या अपघातांची जबाबदारी कोणाची? असा प्रश्न निर्माण झाला आहे. संबंधित विभागाने त्वरित दखल घेऊन हा खांब हटवावा, अन्यथा नागरिक आंदोलनाचा मार्ग स्वीकारतील, असा इशाराही देण्यात येत आहे.
कोणत्याही टिप्पण्या नाहीत:
टिप्पणी पोस्ट करा