शहादा (प्रतिनिधी) येथील पंचायत समिती कार्यालयातील भ्रष्टाचार पुन्हा एकदा चव्हाट्यावर आला असून, एका तक्रारदाराचा चौकशी अहवाल बाजूने देण्यासाठी २ लाख ५० हजार रुपयांची लाच घेणाऱ्या कनिष्ठ सहाय्यकास लाचलुचपत प्रतिबंधक विभागाने (ACB) रंगेहात अटक केली आहे.
अभिजित गोवर्धन भावसार (वय ४३) असे अटक करण्यात आलेल्या कर्मचाऱ्याचे नाव असून, या कारवाईमुळे महसूल आणि प्रशासकीय वर्तुळात मोठी खळबळ उडाली आहे. याप्रकरणी शहादा पोलीस ठाण्यात भ्रष्टाचार प्रतिबंधक कायद्यान्वये गुन्हा दाखल करण्यात आला आहे.
नेमके प्रकरण काय?
मिळालेल्या माहितीनुसार, तक्रारदार हे यापूर्वी कार्थदे दिगर येथे ग्रामपंचायत अधिकारी म्हणून कार्यरत होते. त्यांच्या कार्यकाळातील कामांबाबत भ्रष्टाचाराचे आरोप झाले होते, ज्याची चौकशी सध्या सुरू आहे. या चौकशीचा अहवाल जिल्हा परिषद नंदुरबार यांच्याकडे पाठवताना तो तक्रारदाराच्या बाजूने सादर करण्यासाठी आरोपी अभिजित भावसार याने अडीच लाख रुपयांच्या लाचेची मागणी केली होती.
एसीबीचा सापळा आणि कारवाई
लाचेच्या मागणीनंतर तक्रारदाराने तातडीने लाचलुचपत प्रतिबंधक विभाग, नंदुरबार यांच्याकडे धाव घेऊन तक्रार नोंदवली. एसीबीच्या पथकाने तक्रारीची शहनिशा करून सोमवारी सायंकाळी शहादा येथील हॉटेल स्पाईस अँड ग्रिल परिसरात सापळा रचला. ठरल्याप्रमाणे आरोपी भावसार याने तक्रारदाराकडून अडीच लाख रुपयांची रक्कम स्वीकारताच दबा धरून बसलेल्या पथकाने त्याला रंगेहात पकडले.
तपास पथक
ही धडक कारवाई पोलीस अधीक्षक भारत तांगडे, अपर पोलीस अधीक्षक माधव रेड्डी व सुनील दोरगे यांच्या मार्गदर्शनाखाली पोलीस निरीक्षक विकास लोंढे आणि त्यांच्या पथकाने यशस्वी केली असून, पोलीस उपअधीक्षक प्रशांत भरते या प्रकरणाचा अधिक तपास करत आहेत.
कोणत्याही टिप्पण्या नाहीत:
टिप्पणी पोस्ट करा