नरडाणा प्रतिनिधी:- वीज खांबावरील ॲल्युमिनियम तारांची चोरी करणाऱ्या राजस्थानमधील एका आंतरराज्य टोळीचा नरडाणा पोलिसांनी पर्दाफाश केला आहे. या कारवाईत पोलिसांनी ६ आरोपींना अटक केली असून त्यांच्याकडून चोरीच्या तारा, आयशर वाहन आणि इतर साहित्यासह एकूण १४ लाख १५ हजार रुपयांचा मुद्देमाल जप्त केला आहे.
नेमकी घटना काय?
दिनांक २० जानेवारी ते २४ जानेवारी २०२६ दरम्यान, नरडाणा १३२ के.व्ही. सबस्टेशन समोरील खांबावरून नरडाणा-मेळाणे रोड दरम्यानच्या ४२ गाळ्यांमधील ॲल्युमिनियम कंडक्टर (तारा) चोरीला गेल्या होत्या. सुमारे ४ लाख रुपये किमतीच्या या तारांची चोरी झाल्याप्रकारणी 'रामा फॉस्फेट लि. कंपनी'चे फिर्यादी आदित्य किशोर पोतदार यांनी नरडाणा पोलीस ठाण्यात तक्रार दाखल केली होती. त्यावरून अज्ञात चोरांविरुद्ध गुन्हा (रजि. नं. १२/२०२६) दाखल करण्यात आला होता.
असा लागला छडा
पोलीस निरीक्षक श्रीराम पवार यांच्या मार्गदर्शनाखाली पोलिसांनी सीसीटीव्ही फुटेज आणि तांत्रिक तपासाच्या आधारे राजस्थानमधील भिलवाडा जिल्ह्यातील संशयितांना ताब्यात घेतले. पोलिसी खाक्या दाखवताच त्यांनी गुन्ह्याची कबुली दिली.
अटक करण्यात आलेले आरोपी:
१) नारायणसिंग राजूसिंग वय ३८, २) लोकेश बन्सीसिंग रावत वय २२, ३) हिरासिंग धनासिंग रावत वय २८, ४) प्रकाशसिंग लालसिंग रावत वय २८, ५) भवानीसिंग लालसिंग रावत वय ३०, ६) राधेश्याम गणेशसिंग रावत (सर्व रा. जि. भिलवाडा, राजस्थान).
गुजरातमध्ये केली होती विक्री
तपासादरम्यान समोर आले की, आरोपींनी चोरीचा माल गुजरात राज्यातील वडोदरा येथील हितेनसिंह उर्फ इकतेश्वर नरेंद्रसिंह आणि त्यानंतर अमरेली येथील सुमरा निसार अहमद उस्मानभाई यांना विकला होता. पोलिसांनी या साखळीचा तपास करून मुद्देमाल हस्तगत केला आहे.
जप्त केलेला मुद्देमाल:
वीज वाहक तारा: ३,७५,००० रुपये (०५ बंडल)
आयशर वाहन (RJ 06 GC 7265): १०,००,००० रुपये
मोबाईल फोन: ३०,००,००० रुपये (०४ नग)
इतर साहित्य: १०,००० रुपये (कटर, लोखंडी पक्कड, तराजू इ.)
एकूण किंमत: १४,१५,००० रुपये.
तपास पथक
ही कारवाई धुळे पोलीस अधीक्षक श्रीकांत धिवरे, अपर पोलीस अधीक्षक अजय देवरे, आणि उपविभागीय पोलीस अधिकारी सुनील गोसावी यांच्या मार्गदर्शनाखाली नरडाणा पोलीस ठाण्याचे सहाय्यक पोलीस निरीक्षक निलेश मोरे, श्रीराम पवार आणि त्यांच्या पथकाने यशस्वीरित्या पूर्ण केली.
कोणत्याही टिप्पण्या नाहीत:
टिप्पणी पोस्ट करा