साक्री प्रतिनिधी:- सामाजिक कार्यकर्ते कैलास भदाणे यांचे जिल्हाधिकारी व जिल्हा परिषदेला निवेदन धुळे जिल्ह्यातील सर्व शासकीय कार्यालयांनी अधिकृत National Informatics Centre (NIC) चे ई-मेल आयडी व ई-ऑफिस प्रणालीचा सक्तीने वापर करावा, तसेच ई-मेलद्वारे प्राप्त तक्रारींचा ठराविक कालावधीत निपटारा करण्यात यावा, अशी मागणी सामाजिक कार्यकर्ते कैलास भदाणे यांनी केली आहे.
याबाबत त्यांनी जिल्हाधिकारी कार्यालय धुळे व जिल्हा परिषद धुळे येथे ई-मेलद्वारे तक्रार व निवेदन सादर केले आहे. शासकीय कार्यालयांमध्ये अनेक ठिकाणी खाजगी अथवा अनधिकृत ई-मेल आयडीचा वापर केला जात असून त्यामुळे नागरिकांच्या तक्रारींची दखल घेतली जात नाही, अशी बाब त्यांच्या निदर्शनास आली आहे.
भदाणे यांनी शासनाच्या माहिती तंत्रज्ञान धोरणाचा संदर्भ देत सांगितले की, शासकीय कामकाज अधिक पारदर्शक, गतिमान व उत्तरदायित्वपूर्ण करण्यासाठी सर्व कार्यालयांनी NIC चे अधिकृत ई-मेल आयडी व ई-ऑफिस प्रणालीचा वापर करणे आवश्यक आहे.
त्यांनी आपल्या निवेदनात खालील मागण्या केल्या आहेत –
जिल्ह्यातील सर्व विभाग, उपविभागीय अधिकारी, तहसीलदार व शाखा प्रमुखांनी तातडीने NIC ई-मेल आयडी कार्यान्वित करावेत.
शासकीय ई-मेलवर प्राप्त अर्ज, तक्रारी व पत्रव्यवहाराची नोंद ई-ऑफिस प्रणालीत करण्यात यावी.
प्राप्त तक्रारींचा सात दिवसांच्या आत निपटारा करणे बंधनकारक करण्यात यावे.
ई-मेलवरील अर्ज व तक्रारींकडे दुर्लक्ष करणाऱ्या अधिकारी व कर्मचाऱ्यांवर शिस्तभंगाची कारवाई करण्यात यावी.
याबाबत त्यांनी प्र. सहाय्यक विभागीय पुरवठा अधिकारी, नाशिक विभाग यांच्या दिनांक 22 जानेवारी 2026 च्या आदेशाचाही संदर्भ दिला आहे.
शासनाच्या डिजिटल प्रशासन धोरणाची प्रभावी अंमलबजावणी, माहिती अधिकार कायद्याची पूर्तता, अभिलेख व्यवस्थापन व नागरिकांच्या तक्रारींचे वेळेत निराकरण या दृष्टीने हा निर्णय महत्त्वाचा ठरणार असून, प्रशासन अधिक डिजिटल, पारदर्शक व जनहिताभिमुख होईल, अशी अपेक्षा सामाजिक कार्यकर्ते कैलास भदाणे यांनी व्यक्त केली आहे.
कोणत्याही टिप्पण्या नाहीत:
टिप्पणी पोस्ट करा