जिल्हा आरोग्य अधिकारी डॉ.भिमाशंकर जमादार यांनी केली शिष्टमंडळाशी चर्चा
जिल्ह्यातील आशा स्वयंसेविका व गटप्रवर्तकांच्या अनेक मागण्या प्रलंबित आहेत.सदर मागण्यांबाबत जिल्हा परिषदकडे संघटनेने वेळोवेळी लेखी आणि तोंडी पाठपुरावा केला आहे.परंतु जिल्हा परिषदेने सातत्याने दुर्लक्ष केल्यामुळे संघटनेच्या अध्यक्षा मायाताई परमेश्वर यांच्या मार्गदर्शनाखाली राज्य कार्याध्यक्ष रामकृष्ण बी.पाटील यांच्या नेतृत्वाखाली आज दि.३१ डिसेंबर रोजी लाक्षणिक धरणे आंदोलन करण्यात करण्यात आले.
सदर आंदोलनात लस टोचणाऱ्या आरोग्य कर्मचाऱ्यांप्रमाणे आशा स्वयंसेविकांना कोव्हिड लसीकरणाचा मोबदला अदा करण्यात यावा,सन २०२०-२१ आणि २०२१-२०२२ यावर्षीचा क्षयरोग आणि कुष्ठरोग सर्वेक्षणाच्या कामाचा थकीत मोबदला मिळावा, दि.९ सप्टेंबर २१ च्या शासन आदेशानुसार आशाताईं आणि गटप्रवर्तकांना जुलै २०२१ पासून केलेली मानधन वाढ आणि कोविड भत्ता थकबाकीसह लागू करण्यात यावा,सप्टेंबर २०२१ पासूनची आशा स्वयंसेविका २०००/-आणि गटप्रवर्तक ३०००/- पासून थकीत मानधनाची रक्कम तातडीने अदा करावी, दि.१३ ऑक्टोबर २०२० च्या पत्रानुसार आरोग्यवर्धिनी टिमबेस अंतर्गत काम करणाऱ्या आशा स्वयंसेविकांना सन २०२० पासूनचे थकीत मानधन थकबाकीसह लागू करण्यात यावे,आशा स्वयंसेविका व गटप्रवर्तकांच्या गणवेश खरेदीमध्ये वरिष्ठांचा हस्तक्षेप बंद करावा,एनयुएचएम अंतर्गत काम करणाऱ्या आशा स्वयंसेविकांना आरोग्य वर्धिनीच्या कामाचा मोबदला लागू करावा तसेच नोव्हेंबर २०२१ पासून कामाचे सर्व थकीत मानधन अदा करून आशा स्वयंसेविका व गटप्रवर्तकांची होणारी उपासमार थांबवावी.यासह अन्य प्रलंबित मागण्यांकडे जिल्हा परिषदेचे लक्ष वेधण्यासाठी धरणे आंदोलन करण्यात आले.
वरील मागण्यांवर जिल्हा आरोग्य अधिकारी डॉ.भिमाशंकर जमादार यांनी शिष्टमंडळाशी सविस्तर चर्चा केली.सदर चर्चेत आशा स्वयंसेविका आणि गटप्रवर्तकांच्या थकीत मोबदला अदा करण्याबाबत तालुका आरोग्य अधिकाऱ्यांनी पुनच्छ आदेशित करून आठ दिवसांत मोबदला अदा केला जाईल तसेच निधी कमी पडल्यास शासनाकडे मोबदल्यासाठी लागणाऱ्या निधीची मागणी केली जाईल आणि गणवेश खरेदीमध्ये हस्तक्षेप करणाऱ्यांच्या नावानिशी लेखी तक्रारी कराव्यात दोषींवर निश्चितच कठोर कारवाई केली जाईल असे डॉ.जमादार यांनी आश्वाशित केले.चर्चा समाधानकारक झाल्याने धरणे आंदोलन मागे घेण्यात आले.परंतु आठ दिवसांत मोबदला न मिळाल्यास पुन्हा तीव्र आंदोलन छेडण्याचा इशारा रामकृष्ण बी.पाटील यांनी दिला आहे.
धरणे आंदोलन यशस्वी करण्यासाठी कल्पना भोई, भागिरथी पाटील,सुनंदा पाटील सुनिता भोसले,भारती नेमाडे,शितल सोनवणे,रेखा माया बोरसे,सोनवणे,सुनंदा हाडपे,संगिता पाटील,भारती तायडे,उषा पाटील,अनिता कोल्हे, सुनिता विनंते,माया खैरनार,योगिता बारी,रेखा तायडे,आशा पोहेकर भारती चौधरी,करूणा कुमावत,भारती पाटील आदींनी परिश्रम घेतले.
कोणत्याही टिप्पण्‍या नाहीत:
टिप्पणी पोस्ट करा