चिकसे - साक्री तालुक्यातील चिकसे येथील शेतकरी सिताराम तुळशीराम अहिरे यांच्या शेतातील कांदा चाळीत विक्रीसाठी तयार करून ठेवलेला नव्वद पोते सोयाबीन रात्री (दि. ७) अज्ञात चोरट्यांनी लांबवला. त्यामुळे शेतकरी अहिरे यांचे पाच ते साडेपाच लाख रुपयांचे नुकसान झाले आहे.
घटनेबद्दल अधिक माहिती अशी की, चिकसे-देगाव रस्त्यावर असलेल्या हिंगोटी शिवनाल्याजवळ सिताराम तुळशीराम अहिरे यांचे शेत व घर आहे. काही दिवसांपूर्वी ट्रॅक्टरच्या मळणी यंत्राने सोयाबीनची प्रती पोते अडिचशे रू. दराने मळणी करून तयार केलेला माल रिकाम्या कांदा चाळीत पोते भरून ठेवला होता. ६१ किलो प्रती पोतेप्रमाणे सर्वच ९० कट्टे (पोते) अज्ञात चोरट्यांनी वाहनाद्वारे रात्रीच्या अंधारात चोरून नेला. सोयाबीन पेरणी, कापणी व मळणी यावर सव्वा लाख ते दिड लाख रुपये खर्च करून आजच्या बाजारभावाप्रमाणे साडेतीन ते चार लाख रुपये किमतीचा सोयाबीन चोरी गेल्याने एकत्रित ५ ते साडेपाच लाख रुपये शेतकऱ्याचे लुटले गेल्याची भावना यावेळी उपस्थितांनी व्यक्त केली.
दरम्यान चिकसे परीसरातील देशशिरवाडे व बल्हाणे शिवारातूनही एक-दिड महिन्यांपूर्वी एका शेतकऱ्याच्या व व्यापाऱ्याच्या 'शेड'मधूनही सोयाबीन चोरीची घटना घडली होती. जेबापूरलासुद्धा एका शेतकऱ्याचा शेतमाल नुकताच चोरी झाला. विहिरीतून वीजपंप चोरीच्या घटनाही यापूर्वी चिकसे परीसरात घडल्या आहेत. दुचाकी चोरीच्या घटना तर नियमित सुरूच असतात. पोलिस स्टेशन कडून रात्रीची गस्त वाढवण्याची गरज निर्माण झाली आहे.
तरुण गर्जना वृत्तपत्र सह
चंद्रशेखर अहिरराव धुळे
कोणत्याही टिप्पण्‍या नाहीत:
टिप्पणी पोस्ट करा