अमळनेर नगरपरिषद प्रभाग क्रमांक ३ मधील दलित-मागासवर्गीय वस्तीवर अन्यायकारक प्रभाग रचना..

“अमळनेर नगरपरिषद प्रभाग क्रमांक ३ मधील दलित-मागासवर्गीय वस्तीवर अन्यायकारक प्रभाग रचना..

अमळनेर(प्रतिनिधी)अमळनेर नगरपरिषद निवडणुकीसाठी जाहीर झालेल्या प्रारूप प्रभाग रचनेवर ताडेपुरा प्रभाग क्रमांक ३ मधील नागरिकांनी तीव्र हरकत नोंदवली आहे. या रचनेत मागासवर्गीय, दलित व आदिवासी समाजावर अन्याय झाल्याचा गंभीर आरोप नागरिकांनी केला आहे.

ताडेपुरा प्रभागातील सामाजिक कार्यकर्ते प्रविण  बैसाणे यांनी नागरिकांच्या वतीने हरकत पत्र सादर करताना स्पष्ट केले की, प्रभाग क्रमांक ३ मधील साई गजानन नगर, अहिल्यादेवी नगर, हिंदुस्तान बेकरी परिसर व जय भवानी चौक हे भाग चुकीच्या पद्धतीने प्रभाग क्रमांक १२ मध्ये हलविण्यात आले आहेत. तर आमच्या प्रभागाशी कोणतीही भौगोलिक किंवा सामाजिक सलगता नसलेले सिंधी कॉलनी व वर्णेश्वर महादेव परिसर हे भाग जबरदस्तीने प्रभाग क्रमांक ३ मध्ये जोडण्यात आले आहेत.

“ही कृती महाराष्ट्र नगरपालिका अधिनियम 1965 मधील कलम 10(1)(c) चे उल्लंघन असून, यामध्ये सलगता, अखंडता व सामाजिक वास्तवाचा विचार करण्यात आलेला नाही. परिणामी आमच्या वस्तीतील मागासवर्गीयांचे प्रतिनिधित्व व विकास धोक्यात येणार आहे,” असे निवेदनात नमूद करण्यात आले आहे.

प्रभाग क्रमांक ३ हा प्रामुख्याने दलित, आदिवासी, विमुक्त व भटक्या जातींचा प्रभाग असून येथे आधीच पाणी, रस्ते, गटार, आरोग्य सुविधा यांचा गंभीर अभाव आहे. अशा परिस्थितीत चुकीची प्रभाग रचना ही समाजाला आणखी मागे ढकलणारी ठरत असल्याचे नागरिकांचे म्हणणे आहे.

नागरिकांची ठाम मागणी आहे की –

मूळ प्रभागातील साई गजानन नगर, अहिल्यादेवी नगर, हिंदुस्तान बेकरी परिसर व जय भवानी चौक हे पुन्हा प्रभाग क्रमांक ३ मध्ये समाविष्ट करावेत.

भौगोलिक सलगता नसलेले सिंधी कॉलनी व वर्णेश्वर महादेव परिसर यांना तातडीने वगळण्यात यावे.

हे निवेदन नगरपरिषदेचे निवडणूक पदाधिकारी जगदीश चौधरी व शांताराम पाटील यांनी स्वीकारले असून, यावर अंतिम निर्णय काय होतो याकडे मागासवर्गीय समाजाचे लक्ष लागले आहे.