शिंदखेडा शहरातील भगवा चौक परिसरात गुरुवार, दि. २२ जानेवारी रोजी झालेल्या भीषण अपघातात भडणे येथील कु. प्रियंका रावसाहेब कोळी (वय २१) या तरुणीचा दुर्दैवी मृत्यू झाला. या घटनेमुळे शिंदखेडा शहरासह भडणे परिसरात हळहळ व्यक्त करण्यात येत आहे.
मिळालेल्या माहितीनुसार,कु.प्रियंका कोळी ही एस.एस.व्ही.पी.एस.महाविद्यालयात प्रथम वर्ष विज्ञान शाखेत शिक्षण घेत होती. ती दररोज भडणे येथून ये-जा करून महाविद्यालयात जात होती. गरीब शेतकरी कुटुंबातील प्रियंका ही अभ्यासात हुशार विद्यार्थिनी म्हणून ओळखली जात होती.
गुरुवारी महाविद्यालयातून घरी परतत असताना भगवा चौक परिसरात न्यायालयाच्या बाजूस फिल्टर पाण्याचे जार वाहून नेणाऱ्या मालवाहतूक ‘छोटा हत्ती’ वाहनाने तिला जोरदार धडक दिली. या धडकेत प्रियंकाच्या डोक्याला व चेहऱ्यावर गंभीर दुखापत झाली.अपघातानंतर स्थानिक नागरिकांनी तिला तात्काळ शिंदखेडा ग्रामीण रुग्णालयात दाखल केले. प्रकृती गंभीर असल्याने तिला १०८ रुग्णवाहिकेद्वारे धुळे जिल्हा रुग्णालयात हलविण्यात आले. रुग्णवाहिकेत डॉ. सद्दाम खान, चालक चंद्रशेखर चौधरी तसेच भडणे गावातील ग्रामस्थ उपस्थित होते. मात्र जिल्हा रुग्णालयात दाखल केल्यानंतर डॉक्टरांनी तपासणीअंती तिला मृत घोषित केले.
दरम्यान, नागरिकांनी दिलेल्या माहितीनुसार संबंधित मालवाहतूक वाहनाचा चालक राहुल पाटील (रा. वरुळ) हा मद्यधुंद अवस्थेत असल्याचा आरोप करण्यात येत आहे. ओव्हरटेक करताना वाहनावरील नियंत्रण सुटल्याने हा अपघात झाल्याचे सांगण्यात येत असून, अपघातानंतर वाहन रस्त्याच्या कडेला जाऊन पलटी झाले. या घटनेत चालकाला किरकोळ दुखापत झाली आहे. या दुर्दैवी घटनेनंतर नागरिकांनी मद्यधुंद वाहनचालकांवर कठोर कारवाई करण्याची मागणी केली असून, पोलिसांकडून पुढील तपास सुरू आहे.
कोणत्याही टिप्पण्या नाहीत:
टिप्पणी पोस्ट करा