चोपडा प्रतिनिधी :-चोपडा तालुक्यात कायदा-सुव्यवस्थेचे रक्षण करणाऱ्या पोलिसांनीच कायद्याची पायमल्ली केल्याचा धक्कादायक आणि लाजिरवाणा प्रकार उघडकीस आला आहे. चोपडा ग्रामीण पोलीस स्टेशनच्या हद्दीत रात्री 11 ते 12 वाजेदरम्यान दोन पोलिस कर्मचाऱ्यांमध्ये थेट हाणामारी झाल्याची खात्रीशीर माहिती सूत्रांकडून समोर आली आहे.
रात्रीच्या अंधारात चोपडा हद्दीत त्या अवैध धंद्यातून “आपला फायदा कसा करून घ्यायचा” या वादातूनच पोलिसांमध्येच संघर्ष पेटल्याची गंभीर चर्चा परिसरात रंगली आहे. कायद्याचे रक्षकच जर गुन्हेगारांप्रमाणे वागू लागले असतील, तर सामान्य नागरिकांनी सुरक्षिततेसाठी कुणाकडे पाहायचे, असा थेट सवाल उपस्थित होत आहे.
जनतेच्या पैशावर वेतन घेणारे पोलिस कर्मचारी गुन्हेगारी व्यवहारातून हिस्सा मिळवण्यासाठी एकमेकांवर हात उगारत असतील, तर ही केवळ हाणामारी नसून संपूर्ण पोलीस यंत्रणेवर डाग लावणारी घटना आहे. या प्रकरणामुळे चोपडा तालुक्यातील नागरिकांमध्ये तीव्र संताप व्यक्त केला जात असून “गुन्हेगारांवर कारवाई कधी होणार, की पोलीसच गुन्हेगार झालेत?” असा सवाल आता उघडपणे विचारला जात आहे.
या गंभीर घटनेची तातडीने उच्चस्तरीय चौकशी करून संबंधित दोन्ही पोलिसांवर कठोर कारवाई करण्यात यावी, तसेच चोपडा परिसरात सुरू असलेल्या अवैध व्यवहाराचा पर्दाफाश करून त्यामागील संपूर्ण साखळी उघडी पाडावी, अशी जोरदार मागणी नागरिकांकडून होत आहे.
ड्युटीवर हाणामारी, अवैध धंद्यातून फायदा, आणि कायद्याची थट्टा – हे चित्र जर खरे असेल, तर चोपडा पोलीस स्टेशनमध्ये कायदा नाही, तर अराजकता नांदते आहे, असेच म्हणावे लागेल.
कोणत्याही टिप्पण्‍या नाहीत:
टिप्पणी पोस्ट करा