शिरपूर प्रतिनिधी : शासकीय पदाचा गैरवापर करून सर्वसामान्यांना वेठीस धरण्याचे प्रकार वाढले असतानाच, आता परजिल्ह्यात कार्यरत असलेल्या एका महिला वनधिकाऱ्याने शिरपूर परिसरात आपल्या पतीसह अवैध वसुलीचा उच्छाद मांडल्याचा धक्कादायक प्रकार समोर आला आहे. घरगुती वापराच्या लाकडाची रीतसर पावती असतानाही, वनविभागाचा धाक दाखवून या महिला अधिकाऱ्याने संबंधित गृहस्थाकडून स्वतःच्या हाताने 'फोन पे'द्वारे लाचेची रक्कम स्वीकारल्याने खळबळ उडाली आहे.
मिळालेल्या माहितीनुसार, एका गृहस्थाने आपल्या घरातील जुन्या लाकडाची रीतसर परवानगी व पावती काढून ती लाकडे शिरपूरकडे स्थलांतरित करण्यासाठी वाहनात भरली होती. सर्व कागदपत्रे कायदेशीर असतानाही, रात्रीच्या सुमारास या महिला वनधिकाऱ्याने आपल्या पतीसह सदर वाहन अडवले. संबंधित व्यक्तीने सर्व कायदेशीर पावत्या दाखवूनही या महिला अधिकाऱ्याने आणि तिच्या पतीने कारवाईची भीती दाखवत पैशांची मागणी केली. धक्कादायक बाब म्हणजे, कारवाई टाळण्यासाठी या महिला अधिकाऱ्याने चक्क स्वतःच्या हाताने संबंधित गृहस्थाच्या मोबाईलवरून आपल्या नजीकच्या व्यकितीच्या खात्यावर 'फोन पे'द्वारे लाचेची रक्कम वळवून घेतली.
परजिल्ह्यात नियुक्तीवर असताना आपल्या अधिकार क्षेत्राबाहेर येऊन, रात्रीच्या वेळी पतीला सोबत घेऊन अशा प्रकारे अवैध वसुली करणे, हा गंभीर गुन्हा मानला जात आहे.
वनविभागाची प्रतिमा मलीन करणाऱ्या या महिला अधिकाऱ्याच्या कृत्यामुळे परिसरात संताप व्यक्त होत असून, वरिष्ठांनी या प्रकरणाची सखोल चौकशी करून दोषींवर कठोर कारवाई करावी, अशी मागणी आता जोर धरू लागली आहे. डिजिटल पुराव्यांसह समोर आलेल्या या प्रकारामुळे भ्रष्ट अधिकाऱ्यांचे धाबे दणाणले आहेत.
कोणत्याही टिप्पण्या नाहीत:
टिप्पणी पोस्ट करा