कोचरगाव (ता. दिंडोरी) येथे किरकोळ वादातून झालेल्या चाकू हल्ल्यात गंभीर जखमी झालेल्या तरुणाचा उपचारादरम्यान मृत्यू झाल्याची घटना घडली आहे. या प्रकरणी पोलिसांनी खूनाचा गुन्हा दाखल करून दोन आरोपींना अटक केली आहे.
मिळालेल्या माहितीनुसार, दि. १३फेब्रुवारी २०२६ रोजी रात्री सुमारे ८ वाजण्याच्या सुमारास भरत उर्फ संतोष चिंतामण मोंढे (रा. कोचरगाव, ता. दिंडोरी) हा गावातील मारुती मंदिराजवळ आपल्या मित्रासोबत बोलत उभा होता. त्यावेळी आरोपी पवन सुरेश लिलके (रा. कोचरगाव) हा मोटरसायकलवर तेथे आला व “रस्त्यावर का उभे आहात, हा रस्ता तुमच्या बापाचा आहे का?” अशी विचारणा करत वाद घातला.
यावरून संतोष मोंढे यांनीही प्रत्युत्तर दिल्याने आरोपी पवन लिलके याने त्यांना चापटांनी मारहाण केली. त्यानंतर “तुम्ही येथेच थांबा, मी परत येतो” असे सांगून तो तेथून निघून गेला. काही वेळाने आरोपी पवन लिलके व त्याचे वडील सुरेश पांडुरंग लिलके हे दोघे घटनास्थळी आले आणि त्यांनी संतोष मोंढे व त्यांच्या मित्रास मारहाण केली.
दरम्यान, आरोपी पवन लिलके याने कमरेला खोसून आणलेला चाकू काढून संतोष मोंढे यांच्या पोटावर व छातीवर वार केले. या हल्ल्यात संतोष मोंढे गंभीर जखमी होऊन खाली कोसळले. घटनेनंतर दोन्ही आरोपी घटनास्थळावरून पळून गेले.
स्थानिक नागरिकांनी जखमी संतोष मोंढे यांना तातडीने खाजगी वाहनाने कोचरगाव प्राथमिक आरोग्य केंद्रात दाखल केले. त्यांची प्रकृती गंभीर असल्याने पुढील उपचारासाठी त्यांना नाशिक येथील जिल्हा रुग्णालयात हलविण्यात आले. मात्र १३ फेब्रुवारीपासून मृत्यूशी झुंज देत असलेल्या संतोष मोंढे यांचा (दि. ५ मार्च) सकाळी ६.१० वाजता उपचारादरम्यान मृत्यू झाला.
या प्रकरणी पोलिसांनी खुनाचा गुन्हा दाखल करून पवन सुरेश लिलके व सुरेश पांडुरंग लिलके या दोघांना अटक केली आहे. पुढील तपास पोलीस निरीक्षक भगवान मथुरे यांच्या मार्गदर्शनाखाली पोलीस उपनिरीक्षक अल्ताफ शेख करीत आहेत
कोणत्याही टिप्पण्या नाहीत:
टिप्पणी पोस्ट करा