शिरपूर प्रतिनिधी:- शिरपूर तालुक्यात आदिवासींच्या जमिनींवर डल्ला मारण्याचे प्रकार थांबण्याचे नाव घेत नाहीत. शिंगावे गावातील प्रकरण ताजे असतानाच आता शिरपूर नगरपालिका हद्दीलगत असलेल्या मौजे खर्दे बुद्रुक शिवारातील आदिवासी जमिनीवर खोटा वारस दाखला तयार करून हक्क डावलण्याचा गंभीर डाव उघडकीस आला आहे.
मिळालेल्या माहितीनुसार, बहुचर्चित आदिवासी जमिनीच्या वारस प्रकरणात काही भू-माफियांनी खर्दे बुद्रुक येथील संबंधित अधिकारी आणि गावातील काही प्रतिष्ठित व्यक्तींशी संगनमत करून आदिवासी वारसांचा हक्क बळकावण्याचा प्रयत्न केल्याचा आरोप आहे. या प्रकरणात खोटे प्रतिज्ञापत्र, बनावट पंचनामा, खोटे जबाब आणि अर्ज तयार करून अशिक्षित आदिवासींचे अंगठे घेण्यात आल्याची धक्कादायक बाब समोर आली आहे.
आदिवासींच्या अज्ञानाचा फायदा घेत खोटा वारस दाखला तयार करून वरिष्ठ कार्यालयाकडे अहवाल सादर करण्यात आल्याची माहिती पुढे आली आहे. मात्र हा प्रकार उघडकीस आल्यानंतर संबंधित भू-माफियांचा डाव पुन्हा एकदा फसल्याची चर्चा परिसरात रंगू लागली आहे.
दरम्यान, आदिवासींच्या जमिनींवर वारंवार डोळा ठेवणाऱ्या भू-माफियांविरोधात कडक कारवाई करण्याची मागणी आता जोर धरू लागली आहे. या प्रकरणाची सखोल चौकशी करून दोषींवर कठोर कारवाई करण्यात यावी, अशी मागणी स्थानिकांकडून करण्यात येत आहे.
कोणत्याही टिप्पण्या नाहीत:
टिप्पणी पोस्ट करा