नाशिक प्रतिनिधी:- नाशिक विभागातील काही शाळांमध्ये शालार्थ प्रणालीसंदर्भात गंभीर अनियमितता झाल्याचे समोर आल्यानंतर शिक्षण आयुक्तालयाने कठोर भूमिका घेत सर्व संबंधितांवर कारवाई करण्याचे आदेश दिले आहेत. या प्रकरणात जबाबदार कर्मचारी, पदाधिकारी आणि संबंधित अधिकाऱ्यांवर फौजदारी गुन्हे दाखल करण्याचे निर्देश देण्यात आले आहेत.
शिक्षण आयुक्तालयाने दिलेल्या पत्रानुसार नाशिक विभागातील काही शाळांमध्ये शालार्थ आदेशांची योग्य नोंद आढळून आली नाही. तसेच संबंधित कर्मचाऱ्यांचे शालार्थ आदेश डिजिटल प्रणालीत अपलोड केलेले नसल्याचेही निदर्शनास आले. काही प्रकरणांमध्ये कार्यालयीन नोंदी उपलब्ध नसल्याने शालार्थ आदेश बनावट असल्याची किंवा आदेश नसताना शालार्थमध्ये नोंद केल्याची शक्यता व्यक्त करण्यात आली आहे.
या संदर्भात आधीच जळगाव जिल्ह्यात अशाच प्रकारच्या शालार्थ अनियमिततेप्रकरणी पोलीस ठाण्यात गुन्हा दाखल करण्यात आला आहे. त्याच धर्तीवर नाशिक विभागातील प्रकरणातही संबंधित कर्मचारी, शाळा व्यवस्थापन आणि जबाबदार अधिकाऱ्यांविरोधात गुन्हा दाखल करण्याचे निर्देश देण्यात आले आहेत.
यासोबतच संशयित कर्मचाऱ्यांचे शालार्थ प्रणालीद्वारे दिले जाणारे वेतन तात्काळ स्थगित करण्याचे आदेश देण्यात आले असून संपूर्ण प्रकरणाची चौकशी करून अनुपालन अहवाल सादर करण्यास सांगण्यात आले आहे.
या प्रकरणामुळे शिक्षण विभागात मोठी खळबळ उडाली असून, पुढील तपासात आणखी अनियमितता उघड होण्याची शक्यता व्यक्त केली जात आहे.
कोणत्याही टिप्पण्या नाहीत:
टिप्पणी पोस्ट करा