बोराडी प्रतिनिधी: शिरपूर तालुक्यातील बोराडी येथे सार्वजनिक वितरण व्यवस्थेचा बोजवारा उडाला असून स्थानिक रेशन दुकानदारांच्या मनमानी कारभारामुळे सर्वसामान्य नागरिक कमालीचे त्रस्त झाले आहेत. शासनाकडून गोरगरिबांसाठी येणारे रेशन वेळेवर दिले जात नसल्याच्या तक्रारींनी आता जोर धरला असून, वारंवार हेलपाटे मारूनही रिकाम्या हाताने परत जावे लागत असल्याने ग्रामस्थांमध्ये तीव्र संताप व्यक्त केला जात आहे.
मिळालेल्या माहितीनुसार, बोराडी येथील रेशन दुकाने उघडण्याच्या आणि धान्य वाटप करण्याच्या वेळा निश्चित नसल्यामुळे मजुरी करणाऱ्या कुटुंबांचे मोठे हाल होत आहेत. अनेक नागरिक आपली मजुरी सोडून रेशन घेण्यासाठी दुकानावर येतात, मात्र अनेकदा दुकान बंद असते किंवा 'सर्व्हर डाऊन' असल्याचे कारण सांगून त्यांना परत पाठवले जाते. रेशन दुकानदारांकडून ग्राहकांशी उर्मटपणे बोलले जात असल्याच्याही तक्रारी समोर आल्या आहेत. महिन्याचा पंधरवडा उलटूनही अनेकांना अद्याप धान्याचे वाटप करण्यात आलेले नाही, ज्यामुळे गरीब कुटुंबांच्या चुली पेटणे कठीण झाले आहे.
या संदर्भात नागरिकांनी अनेकदा प्रशासनाकडे तोंडी तक्रारी केल्या आहेत, परंतु अद्याप कोणतीही ठोस कारवाई झालेली नाही.
दुकानदारांच्या या अडेलतट्टू धोरणामुळे शासनाच्या मूळ उद्देशालाच हरताळ फासला जात असल्याचे चित्र दिसत आहे. जर लवकरच रेशन वाटपात सुधारणा झाली नाही आणि दुकानदारांच्या मनमानीला लगाम घातला गेला नाही, तर तहसील कार्यालयावर धडक मोर्चा काढण्याचा इशारा बोराडीतील संतप्त नागरिकांनी दिला आहे. आता पुरवठा विभाग या गंभीर प्रकरणाची दखल घेऊन संबंधित दोषी दुकानदारांवर काय कारवाई करतो, याकडे सर्वांचे लक्ष लागले आहे.
कोणत्याही टिप्पण्या नाहीत:
टिप्पणी पोस्ट करा