नाशिक प्रतिनिधी:-दिंडोरी शहरातील जुन्या कळवण रोड परिसरात सुरू असलेल्या जुगार अड्ड्यावर दिंडोरी पोलिसांनी छापा टाकत पाच जणांविरुद्ध गुन्हा दाखल केला आहे. या कारवाईत रोख रक्कम व मोबाईलसह एकूण २२ हजार ३४० रुपयांचा मुद्देमाल जप्त करण्यात आला आहे.
पोलिसांकडून मिळालेल्या माहितीनुसार, ११ मार्च २०२६ रोजी सायंकाळी सुमारे ५.१० वाजण्याच्या सुमारास जुन्या कळवण रोडवरील युगा फॅशन कपडे दुकानासमोरील मोकळ्या जागेत काही जण पैशांवर जुगार खेळत असल्याची गुप्त माहिती पोलिसांना मिळाली होती. या माहितीच्या आधारे दिंडोरी पोलिसांनी घटनास्थळी धाड टाकली. छाप्यादरम्यान काही जण पैशांची पैज लावून जुगार खेळताना आढळून आले.
या प्रकरणी बाजीराव संपत बर्डे (वय ५०), लिंबाजी सेनाजी गायकवाड (वय ४५), महेंद्र पुंडलिक पगारे (वय ४३), धनशेवर धर्मदेव मांजी (वय ४२) आणि पुंजा नामदेव गायकवाड (वय ५४) या पाच जणांना ताब्यात घेण्यात आले. सर्व आरोपी दिंडोरी तालुक्यातील रहिवासी असल्याची माहिती पोलिसांनी दिली आहे.
कारवाईदरम्यान पोलिसांनी आरोपींकडून जुगारासाठी वापरली जाणारी रोख रक्कम तसेच मोबाईल फोन जप्त केले. जप्त करण्यात आलेल्या मुद्देमालामध्ये रोख पैसे आणि मोबाईलचा समावेश असून त्याची एकूण किंमत २२,३४० रुपये इतकी आहे.
या प्रकरणी आरोपींविरुद्ध महाराष्ट्र जुगार प्रतिबंधक कायदा कलम १२ (अ) अन्वये दिंडोरी पोलिस ठाण्यात गुन्हा दाखल करण्यात आला आहे. पुढील तपास पोलिसांकडून सुरू असून अशा प्रकारच्या अवैध जुगार अड्ड्यांवर कारवाई सुरूच राहणार असल्याचे पोलीस निरीक्षक भगवान मथुरे यांनी स्पष्ट केले आहे.
कोणत्याही टिप्पण्या नाहीत:
टिप्पणी पोस्ट करा