शिरपूर प्रतिनिधी:- शिरपूर शहर आज एका थरारक आणि मन हेलावून टाकणाऱ्या दुहेरी हत्याकांडाने हादरून गेले आहे. महावीर सोसायटी परिसरात घडलेल्या या घटनेमुळे संपूर्ण शहरात भीती, संताप आणि हळहळ व्यक्त केली जात आहे. पत्नीसमोर अपमानास्पद बोलल्याचा राग मनात धरून एका मुलाने स्वतःच्या जन्मदात्या आई-वडिलांची मुसळाने डोक्यात वार करून निर्घृण हत्या केल्याची धक्कादायक घटना उघडकीस आली आहे.
मिळालेल्या प्राथमिक माहितीनुसार, इंदाराम महतो आणि रंजुदेवी इंदाराम महतो हे आपल्या मुलीचे लग्न आटोपून घरी परतले होते. लग्न समारंभानंतर घरात काही कारणावरून कौटुंबिक वाद निर्माण झाला. या वादादरम्यान आरोपी चंदन इंदाराम महतो याला पत्नीसमोर अपमानित केल्याची भावना झाली. त्यातून संताप अनावर झालेल्या आरोपीने घरातील मुसळ उचलून आई-वडिलांच्या डोक्यावर सपासप वार केले.
या भीषण हल्ल्यात इंदाराम महतो आणि रंजुदेवी महतो यांचा जागीच मृत्यू झाला असल्याची माहिती समोर आली आहे. रक्ताच्या थारोळ्यात पडलेल्या दाम्पत्याला पाहून परिसरात एकच खळबळ उडाली. घटनेनंतर आरोपी पळून जाण्याच्या तयारीत असताना स्थानिक नागरिकांनी तत्परता दाखवत त्याला पकडले आणि पोलिसांच्या ताब्यात दिले.
घटनेची माहिती मिळताच उपविभागीय पोलिस अधिकारी विश्वजित जाधव तसेच पोलिस निरीक्षक किशोरकुमार परदेशी यांनी तात्काळ घटनास्थळी धाव घेत पाहणी केली. पोलिसांनी पंचनामा करून मृतदेह शवविच्छेदनासाठी पाठवले असून संपूर्ण परिसर सील करण्यात आला आहे.
या घटनेमुळे महावीर सोसायटी परिसरात भीतीचे आणि तणावाचे वातावरण निर्माण झाले आहे. “ज्यांनी जन्म दिला, त्यांचाच जीव घेण्याइतका क्रूरपणा मुलामध्ये कसा निर्माण झाला?” असा संतप्त सवाल नागरिकांकडून उपस्थित केला जात आहे. आरोपीला कठोरात कठोर शिक्षा व्हावी, अशी मागणी स्थानिक नागरिकांनी केली आहे.
दरम्यान, पोलिसांकडून आरोपी चंदन इंदाराम महतो याच्याविरुद्ध भारतीय न्याय संहितेनुसार खुनाचा गंभीर गुन्हा दाखल करण्याची प्रक्रिया सुरू असून, कौटुंबिक वाद, मानसिक ताणतणाव आणि घटनेमागील नेमके कारण याचा सखोल तपास सुरू करण्यात आला आहे.
या हृदयद्रावक घटनेने शिरपूर शहर सुन्न झाले असून, एका क्षणाच्या संतापाने संपूर्ण कुटुंब उद्ध्वस्त झाल्याची भावना नागरिक व्यक्त करत आहेत.
कोणत्याही टिप्पण्या नाहीत:
टिप्पणी पोस्ट करा