शिरपूर प्रतिनिधी दि. १ ऑगस्ट : महाराष्ट्र राज्य मार्ग परिवहन महामंडळाच्या शिरपूर आगारात प्रवासी व विद्यार्थ्यांच्या सेवेसाठी सुरू करण्यात आलेल्या ‘राजमाता जिजाऊ बससेवे’चा लोकार्पण सोहळा उत्साहपूर्ण वातावरणात पार पडला. कार्यक्रमाचे नियोजन शिरपूर आगाराचे आगार व्यवस्थापक महेंद्र पाटील यांनी केले.
कार्यक्रमास शिरपूर तालुक्याचे आमदार काशीराम (दादा) पावरा, शिरपूर-वडाळे नगरपरिषदेच्या उपनगराध्यक्षा सौ. संगीता ताई देवरे, शिवसेना तालुकाध्यक्ष हेमंत पाटील, प्रसाद पाटील, महाराष्ट्र राज्य मार्ग परिवहन महामंडळाचे विभागीय वाहतूक अधिकारी दीप वंजारा, डीटीएस सुनील महाले, स्थानक प्रमुख मनोज पाटील, गौरव फाउंडेशनचे अध्यक्ष एम. के. बांबरे, बाबूजी शर्मा यांच्यासह अनेक मान्यवर उपस्थित होते.
कार्यक्रमाच्या प्रारंभी आमदार काशीराम (दादा) पावरा यांच्या हस्ते दीपप्रज्वलन करण्यात आले. त्यानंतर राजमाता जिजाऊ बससेवेची विधिवत पूजा करून श्रीफळ वाढविण्यात आले. फीत कापून बससेवेचे लोकार्पण करण्यात आले.
यावेळी बोलताना आमदार पावरा यांनी शिरपूर आगारातील अधिकारी, चालक, वाहक व यांत्रिक कर्मचाऱ्यांना मार्गदर्शन केले. प्रवाशांना कुटुंबातील सदस्यांप्रमाणे आपुलकीची व सन्मानाची वागणूक द्यावी, सुरक्षित, वेळेवर आणि दर्जेदार सेवा पुरविणे ही प्रत्येक कर्मचाऱ्याची जबाबदारी असल्याचे
त्यांनी सांगितले प्रामाणिकपणा, निष्ठा आणि सेवाभाव जपणाऱ्या अधिकारी व कर्मचाऱ्यांचा गौरव संपूर्ण राज्यात होत असल्याचे नमूद करत त्यांनी शिरपूर आगाराचे आगार व्यवस्थापक महेंद्र पाटील, स्थानक प्रमुख मनोज पाटील तसेच सर्व अधिकारी व कर्मचाऱ्यांच्या कार्याचे कौतुक केले. प्रवाशांच्या सेवेसाठी अशीच तत्परता कायम ठेवण्याचे आवाहनही त्यांनी केले.
महाराष्ट्र राज्य मार्ग परिवहन महामंडळाची प्रतिमा अधिक उंचावण्यासाठी सर्वांनी एकजुटीने कार्य करावे. प्रवाशांना अधिकाधिक चांगल्या सुविधा उपलब्ध करून देण्यासाठी शासन व परिवहन विभाग सातत्याने प्रयत्नशील असल्याचेही आमदार पावरा यांनी स्पष्ट केले.
या लोकार्पण सोहळ्यास शिरपूर आगारातील अधिकारी, कर्मचारी, चालक, वाहक, यांत्रिक कर्मचारी तसेच नागरिक मोठ्या संख्येने उपस्थित होते. कार्यक्रम उत्साहपूर्ण वातावरणात संपन्न झाला.
कोणत्याही टिप्पण्या नाहीत:
टिप्पणी पोस्ट करा